Мазкур учрашув AA ROSC баҳолашлари доирасида ўтказилиб, унинг мақсади – Ўзбекистоннинг бухгалтерия ҳисоби ва аудит тизимини ривожлантириш, халқаро стандартларга мувофиқлигини ошириш ҳамда бу соҳадаги институционал базани такомиллаштиришга йўналтирилган.

Маъулмот учун: AA ROSC баҳолашлари Жаҳон банки томонидан 121 тадан ортиқ мамлакатларда ўтказилган халқаро миқёсдаги таҳлил жараёни бўлиб, бу Молиявий ҳисоботнинг халқаро стандартлари (МҲХС, IFRS) ва Аудитнинг халқаро стандартларига (АХС, ISA) ўтиш ҳолатини баҳолаш, халқаро талаблар асосида молиявий ҳисобот тизимини такомиллаштиришга хизмат қилади.

Учрашув давомида Жаҳон банки вакиллари томонидан AA ROSC баҳолашларини ўтказиш учун тайёрланган сўровномаларнинг тегишли вазирлик ва идоралар томонидан тўлдирилиш ҳолати, уларда кўтарилган муҳим масалалар, шунингдек сўнгги йилларда бухгалтерия ҳисоби ва аудит соҳасидаги қонунчилик нормаларидаги ўзгаришлар таҳлил қилинди.

Жумладан, молиявий ҳисобдорлик ва аудит тизими – халқаро тажриба асосида корхоналарнинг ҳисобдорлик тизимини ривожлантириш, халқаро стандартларга мувофиқ аудит тизимини жорий этиш бўйича таклифлар муҳокама қилинди. Шунингдек, Молиявий ҳисоботнинг халқаро стандартларини жорий қилишда халқаро талаблар ва янги технологияларни жорий этиш зарурияти қайд этилди.

Учрашув якунида томонлар ROSC лойиҳаси доирасидаги ҳамкорликни янада ривожлантириш ва уни қисқа муддатларда якунлаб, натижаларни эълон қилиш, Ўзбекистонда молиявий ҳисобдорлик ва аудитни такомиллаштириш, шунингдек, ҳалқаро стандартларга тўлиқ интеграция қилиш бўйича биргаликда иш олиб боришга келишиб олдилар.

Иқтисодиёт ва молия вазирлиги

Ахборот хизмати