Ўзбекистон Республикаси Иқтисодиёт ва молия вазирлиги

Жорий йилнинг 23 январь куни Ўзбекистон Республикасида Бухгалтерия ҳисоби ва аудит стандартлари ҳамда қоидаларига риоя этилиши тўғрисидаги ҳисобот (АА ROSC) жараёнларига бағишланган учрашув ўтказилди. Мазкур учрашув Иқтисодиёт ва молия вазирлиги Бухгалтерия ҳисоби ва аудит услубиёти бошқармаси бошлиғи Отабек Баракаев ҳамда вазирликнинг бир қатор мутахассислари, Жаҳон банкидан Молиявий бошқарув бўйича катта мутахассис Андрей Бусуёк, шунингдек, банкнинг қатор ходимлари, Марказий банк, Давлат активларини бошқариш агентлиги, Истиқболли лойиҳалар миллий агентлиги ҳамда бошқа давлат ва жамоат ташкилотларининг масъул ходимлари иштирокида, ВКС шаклида бўлиб ўтди.

Учрашув АА ROSC баҳолашлари доирасида ўтказилиб, унинг мақсади — Ўзбекистоннинг бухгалтерия ҳисоби ва аудит тизимини ривожлантириш, халқаро стандартларга мувофиқлигини ошириш ҳамда бу соҳадаги институционал базани такомиллаштиришга йўналтирилган.

Маъулмот учун: АА РОСC (“Report on the Observance of Standards and Codes Accounting and Auditing”) баҳолашлари Жаҳон банки томонидан 121 дан ортиқ мамлакатларда ўтказилган халқаро миқёсдаги таҳлил жараёни бўлиб, бу Молиявий ҳисоботнинг халқаро стандартлари (МҲХС, IFRS) ва Аудитнинг халқаро стандартларига (АХС, ISA) ўтиш ҳолатини баҳолаш, халқаро талаблар асосида молиявий ҳисобот тизимини такомиллаштиришга хизмат қилади.

Учрашувда ROSC баҳолашининг халқаро аҳамияти ва янги қўлланма асосида баҳолаш жараёнлари, бухгалтерия ҳисоби ва аудит соҳаларини халқаро МҲХС ҳамда АХС стандартларига мувофиқлигини баҳолаш, бухгалтерия ҳисоби ва аудит соҳаси бўйича мавжуд ҳуқуқий ҳамда институционал базани такомиллаштиришга оид таклифлар муҳокама қилинди.

Учрашув давомида баҳолаш жараёнида қўлланадиган 7 та индикатор, 15 та суб-индикатор ва уларнинг баҳолаш мезонлари ҳақида батафсил маълумот берилди. Бу индикаторлар молиявий ҳисобот талаблари, назорат механизмлари, малака ва ўқув тизимларини баҳолашда муҳим восита сифатида хизмат қилади.

Шунингдек, Жаҳон банки вакиллари томонидан АА ROS баҳолашларини ўтказиш учун сўровномалар тайёрланиб, тегишли ташкилотларга тақдим этилди. Ҳисоботнинг дастлабки натижалари 2025 йилнинг апрель ойида эълон қилиниши режалаштирилган.

АА ROSC баҳолашининг якуний ҳисоботлари Ўзбекистоннинг бухгалтерия ҳисоби ва аудит соҳаларини такомиллаштиришда муҳим аҳамият касб этади. Шу билан бирга, бу ҳисобот бухгалтерия ҳисоби ва аудит соҳаларида шаффофликни ошириш, барқарор ривожланишни таъминлаш ҳамда соҳани халқаро талаблар асосида ислоҳ қилиш учун дастурий йўналишларни белгилашда муҳим аҳамиятга эга.

Иқтисодиёт ва молия вазирлиги

Ахборот хизмати