Ўзбекистон Республикаси Иқтисодиёт ва молия вазирлиги

Учрашувда “Al Arkkan Training Center” компаниясининг молия директори Файсал Сиддиқ, Ўзбекистон Республикаси Вазирлар Маҳкамаси ҳузуридаги Миграция агенлиги директори Беҳзод Мусаев, Иқтисодиёт ва молия вазири ўринбосарлари Илҳомжон Умрзаков ва Отабек Фозилкаримов ҳамда бошқа масъул вакиллар иштирок этди.

Маълумот учун: Al Arkkan Training Center – турли соҳалар бўйича профессионал ривожланиш ва таълим хизматларини тақдим этувчи ўқув маркази бўлиб, юқори малакали мутахассислар ва халқаро стандартларга асосланган курслар орқали билим олиш имконини беради. Ушбу марказ минтақавий ва халқаро бозор эҳтиёжларини қондириш мақсадида ташкил этилган.

Ўз фаолиятини молиявий ва бизнес таълими, профессионал сертификатлаш курслари, рақамли технологиялар ва ИТ-таълим, шахсий ва корпоратив ривожланиш дастурлари ва бош йўналишларда олиб боради.

Учрашув давомида томонлар инсон капиталини ривожлантириш, хусусан, озиқ-овқат хавфсизлиги соҳасида умумий овқатланиш йўналишларида фаолият олиб борувчилар ҳамда соғлиқни сақлаш соҳасидаги ходимларни халқаро стандартлар асосида ўқитиш, касб-ҳунар таълими соҳасида компания тажрибаси ва амалга оширилган лойиҳалар, шунингдек, шакллантирилаётган лойиҳалар юзасидан таклифларни муҳокама қилди.

Шунингдек, муҳокамалар давомида юқорида қайд этилган йўналишларда давлат-хусусий шериклик лойиҳаларини амалга ошириш истиқболлари, ҳамшираларни хориж тилларига ўқитиш ва қисқа муддатли касбий кўникмаларини ошириш, хусусан, малакали тиббиёт ходимлари ва ҳамширалар тайёрлаш учун халқаро стандартлар асосида ўқув масканини ташкил этиш юзасидан фикр алмашди.

Музокаралар якунида томонлар ўзаро ҳамкорлик алоқаларини ривожлантириш ва кенгайтириш ҳамда белгиланган йўналишларда тизимли ва самарали фаолият олиб боришга келишиб олди.

Иқтисодиёт ва молия вазирлиги

Ахборот хизмати