Туркия билан соғлиқни сақлаш соҳасида ҳамкорликни ривожлантириш масалалари муҳокама қилинди
2025-01-17 20:25:00 / Вазирлик янгиликлари
Туркия томони соғлиқни сақлаш соҳасини рақамлаштириш, тиббий суғурта тизими, тиббий хизматлар рўйхатини кодлаш, дори-дармонлар таъминоти ва уларни назорат қилиш соҳасида ўз тажрибаларини тақдимот қилишди. Хусусан, соғлиқни сақлаш соҳасида молиявий бошқарувни такомиллаштириш, дори-дармон эҳтиёжларини онлайн назорат қилиш ва тиббий суғурта тизимини янада ривожлантириш бўйича самарали механизмлар кўриб чиқилди.
Ўзбекистон томони Туркия тажрибасини ўрганиш ва уни мамлакатимизда соғлиқни сақлаш тизимини молиялаштириш ва бошқарув тизимини такомиллаштириш жараёнида қўллаш ташаббусини қўллаб-қувватлади. Хусусан, тиббий хизматлар кўрсатиш сифатини яхшилаш мақсадида соғлиқни сақлаш соҳасига ажратилаётган маблағлардан оқилона фойдаланиш юзасидан фикр алмашилди.
Шунингдек, музокараларда шифохоналардаги маълумотларни онлайн кузатиш, дори-дармон эҳтиёжларини прогнозлаш ва мониторинг қилиш, маълумотлар алмашинувини таъминлаш учун рақамлаштиришни жадаллаштириш жуда муҳимлигига эътибор қаратилди. Ушбу ёндашув тизим бошқарувини оптималлаштириш ва ажратилаётган маблағларнинг самарадорлигини оширишга имкон беради.
Музокаралар якунида томонлар соғлиқни сақлаш соҳасида қўшма ташаббусларни амалга ошириш ва ушбу йўналишда тизимли ҳамкорликни ривожлантириш бўйича келишувга эришди. Мазкур ҳамкорлик тизимни молиялаштириш механизмларини такомиллаштириш орқали аҳолига кўрсатилаётган хизматлар сифатини оширишга кўмак беради.
Иқтисодиёт ва молия вазирлиги
Ахборот хизмати