1. 2030 йилгача давлат-хусусий шериклик тамойиллари асосида амалга ошириладиган йирик инфратузилма лойиҳалари рўйхати шакллантирилиб, тасдиқланди. Бугунги кунда мазкур 63 та лойиҳанинг 39 таси бўйича ишлар бошлаб юборилди.

Жумладан:

 – Фарғона вилоятида ДХШ асосида кўп тармоқли шифохона қуриш ва хусусий бошқарувга бериш лойиҳаси бўйича халқаро тендер босқичи эълон қилинди;

 – Самарқанд вилоятида электр тармоқларини модернизация қилиш ва хусусий сектор бошқарувига бериш лойиҳаси бўйича халқаро тендер эълон қилинди;

 – Осиё тараққиёт банки кўмагида Тошкент шаҳри ва Тошкент вилоятида ДХШ асосида мактаблар ташкил этиш лойиҳаси юзасидан халқаро тендер очилди, биринчи босқичи якунланди ҳамда якуний босқичи эълон қилинди;

 – Урганч халқаро аэропортини ДХШ асосида модернизация қилиш ва хусусий бошқарувга бериш лойиҳаси бўйича халқаро тендер эълон қилинди ва биринчи босқичи якунланиб, якуний босқичи очилди.

 – Қуввати 41.6 МWт (Мегаватт) бўлган кичик ва ўрта гидроэнергетика лойиҳаси юзасидан тендернинг якуний босқичига ўтилди.

2024 йилда имзоланган жами давлат-хусусий шериклик лойиҳаларида ҳудудлардаги кичик лойиҳалар умумий қиймати 33 млн АҚШ долларни ташкил этди.

1. Соҳани институционал ривожлантириш йўналишида ҳам сезиларли ўзгаришлар амалга оширилди. Хусусан, 2030 йилгача 30 млрд долларлик ДХШ лойиҳаларини амалга оширишга кўмаклашувчи “Давлат-хусусий шериклик лойиҳалари маркази” лойиҳа офиси ташкил этилди. ДХШ йўналишида мутахассисларни қайта тайёрлаш ва малакасини ошириш бўйича чора-тадбирлар ишлаб чиқилди.

Йирик намунавий (Флагшип) лойиҳаларни амалга ошириш учун лойиҳа экспертлари, лойиҳа менежерлари бириктирилди, лойиҳаларни ривожлантиришда ёндашув ўзгарди.

1. Йил давомида Жанубий Корея, Туркия ва Форс кўрфази давлатларида ўтказилган тақдимотлар (road show) доирасида салоҳиятли хорижий инвесторларни истиқболли ДХШ лойиҳалари билан таништирилди.

Шу билан бирга, Жаҳон банки гуруҳи ва Халқаро валюта жамғармасининг (ХВЖ) йиллик учрашувлари доирасида Жаҳон банки вакиллари билан давлат-хусусий шериклик дастурлари асосида амалга оширилаётган лойиҳалар юзасидан фикр алмашилди.

“Ўзбекистон–2030” стратегиясида Давлат-хусусий шерикликни ривожлантириш мақсадларига мутаносиб ва тизимли равишда эришиш мақсадида Давра суҳбати ўтказилди, мазкур тадбирда 200 дан ортиқ давлат органлари вакиллари, маҳаллий ва халқаро молия институтлари экспертлари ҳамда инвесторлар жамлаган ҳолда ДХШ тизимини такомиллаштириш бўйича амалий таклиф ва муҳокамалар олиб борилди.

2025 йилда ДХШ соҳасида олдинга янада юқори мақсадлар белгиланган.

1. Хусусан, таълим соҳасида - ОТБ кўмагида Самарқанд вилоятида 100 та мактабгача таълим муассасасини қуриш, реконструкция қилиш ва жиҳозлаш, ОТБ кўмагида Тошкент шаҳри ва Тошкент вилоятида жами 14 минг ўринли 13 та умумтаълим мактабини қуриш ва жиҳозлаш, соғлиқни сақлаш соҳасида – Халқаро молия корпорацияси кўмагида Фарғона вилоятида 800 ўринли кўп тармоқли шифохона ташкил этиш, транспорт соҳасида – Наманган, Бухоро, янги Тошкент халқаро аэропортларни хусусий бошқарувга бериш, энергетика соҳасида – Самарқанд, Жиззах ва Сирдарё вилоятлари электр энергияси тармоқлари бошқарувига хусусий сектор жалб қилиш ва бошқа йўналишларда умумий қиймати 6,5 млрд АҚШ доллари миқдоридаги Давлат-хусусий шериклик тамойиллари асосида лойиҳалар бўйича битимлар имзоланади.
2. Кичик лойиҳалар кўламини кенгайтириш мақсадида лойиҳани амалга оширишнинг янги соддалаштирилган механизми ишлаб чиқилади.
3. Қиймати 1 млн доллардан ортиқ бўлган лойиҳаларни амалга ошириш тартиби юзасидан қўлланма (Ҳандбоок) ишлаб чиқилиб, амалиётга жорий этилади.
4. ДХШ лойиҳалари амалга оширилишининг барча босқичларини ҳамда лойиҳалар реестрини юритиш ва мониторинги олиб борилишини янада такомиллаштириш мақсадида ДХШ лойиҳаларининг электрон платформаси ишга туширилади.
5. 2025 йилда Давлат-хусусий шерикликни янада ривожлантириш мақсадида III Давлат-хусусий шериклик Форуми ташкил этиш режалаштирилган. Форум ўз навбатида Ўзбекистон ҳукумати, халқаро молия ва кредит ташкилотлари вакиллари ҳамда хусусий инвесторлар мулоқот майдони сифатида хизмат қилади.

Иқтисодиёт ва молия вазирлиги

Ахборот хизмати