Европа тикланиш ва тараққиёт банки билан “Ўзбекистоннинг декарбонизация стратегиясини илгари суриш ва яшил иқтисодиётга ўтиш бўйича ҳамкорлик” тўғрисида Меморандум имзоланди
2024-11-14 13:15:00 / Вазирлик янгиликлари
Учрашувда ЙТТБнинг Иқлим стратегияси ва етказиб бериш бўйича бошқарувчи директори Ҳаррй Бойд-Cарпентер, иқлим стратегияси ва минтақавий етказиб бериш бўлими директори Димитри Гвиндадзе ҳамда Иқлим таҳлили ва NDC раҳбари ва директор ёрдамчиси Сунг-Аҳ Кюн иштирок этди.
Учрашувда ЙТТБ билан ҳамкорликда амалга оширилаётган лойиҳаларнинг жорий ҳолати, хусусан, Ўзбекистонда метан эмиссиясини қисқартириш соҳасида олиб борилаётган ишлар атрофлича муҳокама қилинди.
Маълумот учун: Ўзбекистон 2022 йилда бутун дунё бўйлаб метан эмиссиясини қисқартиришга қаратилган Глобал метан мажбуриятига (Глобал Methane Pledge) қўшилган.
Шунингдек, томонлар Ўзбекистоннинг Париж битими бўйича ўз мажбуриятларига мувофиқ, Ўзбекистоннинг узоқ муддатли кам углеродли ривожланиш ва иқлимга чидамли стратегиясини амалга ошириш юзасидан истиқболли ҳамкорлик йўналишларини келишиб олди.
Ушбу йўналишдаги ҳамкорликнинг илк қадами сифатида Иқтисодиёт ва молия вазирлиги ҳамда ЙТТБ ўртасида “Ўзбекистоннинг декарбонизация стратегиясини илгари суриш ва яшил иқтисодиётга ўтиш бўйича ҳамкорлик” тўғрисида Англашув меморандуми имзоланди.
Мазкур меморандум доирасида 200 миллион АҚШ долларигача бўлган миқдорда молиявий тизимни яшиллаштириш бўйича махсус молиявий дастурни амалга оширишни қўллаб-қувватлаш учун молиявий механизмларни ўрганиш ва жорий қилиш кўзда тутилмоқда.
Учрашув якунида, томонлар меморандум доирасида Ўзбекистонда молия секторини яшиллаштириш, чиқинди ва сув секторларида метан эмиссиясини камайтириш бўйича инвестиция дастурини ишлаб чиқиш ҳамда сув, озиқ-овқат ва энергия учун “Нехус” бўйича мамлакат платформасини амалга ошириш бўйича ҳамкорлик қилишга келишиб олди.
Иқтисодиёт ва молия вазирлиги
Ахборот хизмати