Маълумот учун: Иссиқхона газлари эмиссияси савдоси тизими (Emission Trading System – ETS) ифлослантирувчи моддалар чиқиндиларини, хусусан иссиқхона газларини камайтириш учун иқтисодий рағбатлантириш орқали ифлосланишни назорат қилишнинг бозорга йўналтирилган ёндашуви бўлиб, ҳозирда ушбу тизим 36 та давлатда жорий қилинган. 

Учрашувда Осиё тараққиёт банкининг маслаҳатчилари Мелание Ҳобсон, Роберт Бойcе ва Фернандо Антолин, Минтақавий ҳамкорлик бўйича мутахассиси Бегзод Джалилов ва Иқлим ўзгариши бўйича мутахассиси Низомиддин Рахманов ҳамда вазирликнинг Яшил иқтисодиётга ўтиш ва ривожлантиришни мувофиқлаштириш бошқармаси вакиллари иштирок этди.

Учрашувда томонлар ўртасида республикада иссиқхона газлари эмиссиясини камайтиришни рағбатлантириш мақсадида халқаро илғор тажрибалар асосида Ўзбекистонда иссиқхона газлари эмиссияси савдоси тизимини йўлга қўйиш имкониятларини баҳолаш ҳамда ушбу тизимни жорий этиш чораларини кўриш муҳокама қилинди.

Учрашув якунида, томонлар эмиссия савдо тизимини жорий этиш бўйича норматив-ҳуқуқий базани яратиш ва ушбу соҳадаги ҳамкорликни кенгайтиришга келишиб олди.

Иқтисодиёт ва молия вазирлиги 

Ахборот хизмати