Жаҳон банки вакиллари билан бухгалтерия ҳисоби ва аудит соҳасини ривожлантиришга доир учрашув ўтказилди
2024-10-08 16:00:00 / Вазирлик янгиликлари
Учрашувда Жаҳон банки вакиллари, эксперт ва мутахассислари Андреи Бусуиоc, Арман Ватян, Нургуль Татыбекова ва Жамшид Ирискуловлар ҳамда Иқтисодиёт ва молия вазирлиги Бухгалтерия ҳисоби ва аудит услубиёти бошқармаси бошлиғи Отабек Баракаев ҳамда бошқарма ходимлари иштирок этдилар.
Учрашувда бухгалтерия ҳисоби соҳасини тизимлаштириш, Молиявий ҳисоботнинг халқаро стандартларига (МҲХС, IFRS) ўтишни рағбатлантириш ва тадбиркорлик субъектларининг МҲХСга ўтиши учун қўшимча шарт-шароитлар яратиш, молиявий ҳисоботнинг ташқи сифат назорати тизимларини такомиллаштириш, шунингдек, аудиторлик хизматлари сифатини халқаро стандартлар асосида таъминлаш каби долзарб масалалар муҳокама қилинди.
Хусусан, Жаҳон банки билан биргаликда МҲХС стандартлари асосида тузилган молиявий ҳисоботларнинг тўғрилиги, шаффофлиги ва сифатини назорат қилиш имконини берувчи дастурий таъминот тўпламини ишлаб чиқиш бўйича техник топшириқ тайёрланганлиги таъкидланди. Мазкур дастурий мажмуани кейинчалик МҲХСларни жорий қилишнинг автоматлаштиришга қаратилган Кенгайтирилган бизнес ҳисобот тили (XBRL, eXtensible Reporting Language) дастурий маҳсулоти билан интегарциялаш масалалари муҳокама қилинди.
Бундан ташқари, “Аудиторлик фаолияти тўғрисида”ги қонунга мувофиқ, Аудитнинг халқаро стандартларини (АХС, ISA) ўзбек тилига таржима қилиш бўйича амалга оширилаётган техник ишларнинг якуний босқичи муҳокама қилиниб, ушбу масалани жадаллаштириш лозимлиги таъкидланди.
Учрашув якунида, Жаҳон банки вакиллари ҳам ўз таклиф, мулоҳаза ва кутилмаларини билдиришди, шунингдек, томонлар биргаликда бухгалтерия ҳисоби ва аудит соҳасини ривожлантириш бўйича ишларни давом эттириш ҳамда маслаҳатлашувларни янада фаоллаштиришга келишиб олинди.
Иқтисодиёт ва молия вазирлиги
Ахборот хизмати