Таълим кредитлари тизимини такомиллаштириш ва EduImkon дастури доирасидаги ислоҳотлар муҳокама қилинди
2026-10-23 16:25:00 / Вазирлик янгиликлари
Тадбирда Иқтисодиёт ва молия вазирлиги, Жаҳон банки, тегишли вазирлик ва идоралар, тижорат банклари, олий таълим муассасалари ҳамда жамоат ташкилотлари вакиллари иштирок этди.
Учрашувда таълим кредитлари тизимининг амалдаги ҳолати, эришилган натижалар, молиялаштириш механизмларини такомиллаштириш ҳамда давлат маблағларидан самарали фойдаланиш масалалари муҳокама қилинди.
Қайд этилганидек, 2021 йилдан 2026 йилнинг учинчи чораги якунига қадар қарийб 7,7 трлн сўмлик таълим кредитлари ажратилган бўлиб, кредит ажратиш ҳолатлари сони 663 мингдан ошган. Шундан 5,8 трлн сўмдан ортиғи хотин-қизларнинг таълим олишини қўллаб-қувватлашга йўналтирилган. Уларга ажратилган кредитлар сони 515 мингдан ошган.
Мулоқотнинг асосий мавзуларидан бири Жаҳон банкининг 250 млн АҚШ доллари миқдоридаги молиялаштириши асосида амалга оширилаётган EduImkon дастури бўлди.
Дастур олий таълим олишда молиявий имкониятлар тенглигини кенгайтириш, таълимни молиялаштиришни меҳнат бозори эҳтиёжларига мувофиқлаштириш ва кредитлаш тизимининг узоқ муддатли молиявий барқарорлигини таъминлашга қаратилган.
Шу доирада хотин-қизлар, кам таъминланган оилалар фарзандлари ва устувор таълим йўналишларида таҳсил олувчиларни манзилли қўллаб-қувватлаш, кредитларни расмийлаштириш, мониторинг қилиш ва қайтариш жараёнларини рақамлаштириш, шунингдек, битирувчилар даромадига боғлиқ кредит қайтариш механизмларини халқаро тажриба асосида ўрганиш масалалари кўриб чиқилди.
Шунингдек, халқаро экспертлар иштирокида таълим кредитлари тизимининг молиявий-иқтисодий моделини ишлаб чиқиш, мавжуд рақамли платформани баҳолаш ҳамда меҳнат бозори билан боғлиқликни таҳлил қилиш бўйича режалаштирилган ишлар юзасидан маълумот берилди.
Учрашувда хорижий давлатларнинг TOP-300 университетларида таҳсил олиш, шунингдек, хорижда қисқа муддатли касбий тайёргарлик ва тил курсларида ўқиш учун таълим кредитлари ажратиш бўйича ишлаб чиқилаётган таклифлар ҳам муҳокама қилинди.
Бунда молиялаштириш шартлари ва лимитлари, таълим муассасаларининг сифати, кредитларни қайтариш тартиби ҳамда битирувчиларнинг келгусидаги бандлиги билан боғлиқ жиҳатларга эътибор қаратилди. Ушбу механизмлар ҳозирда таклиф босқичида экани қайд этилди.
Тадбир давомида таълим кредитлари тизимида ижтимоий ва экологик омилларни ҳисобга олиш, инклюзивликни таъминлаш ҳамда мурожаатларни кўриб чиқиш тартибини такомиллаштириш юзасидан ҳам фикр алмашилди.
Учрашув якунида манфаатдор томонлар томонидан билдирилган фикр ва таклифларни келгусидаги ислоҳотларни ишлаб чиқиш жараёнида инобатга олиш белгиланди.
Иқтисодиёт ва молия вазирлиги Жаҳон банки ҳамда бошқа ҳамкор ташкилотлар билан биргаликда таълимни молиялаштириш тизимини такомиллаштириш бўйича ишларни давом эттиради.
Иқтисодиёт ва молия вазирлиги
Ахборот хизмати ва коммуникациялар бошқармаси