Тадбирнинг асосий мақсади Ўзбекистон ва Россияда ташаббусли бюджетлаштиришни ривожлантириш бўйича шаклланган амалий тажрибани ўрганиш, фуқароларнинг бюджет жараёнларидаги иштирокини кенгайтириш механизмларини муҳокама қилиш ҳамда соҳада қўлланилаётган замонавий ёндашувлар юзасидан фикр алмашишдан иборат бўлди.
 

Тадбирда Ўзбекистонда ташаббусли бюджетлаштириш тажрибасининг таълим соҳасига татбиқ этилиши мисолида «Менинг мактабим» лойиҳасига ҳам алоҳида эътибор қаратилди. Мазкур лойиҳа орқали ташаббусли бюджетлаштириш амалиёти мактаб даражасига олиб чиқилиб, 5–11-синф ўқувчиларига ўз мактаблари учун лойиҳалар таклиф этиш ва улар бўйича овоз бериш имконияти яратилди. 2025/2026-ўқув йилидан бошлаб лойиҳа барча мактабларни қамраб олди.
 

«Менинг мактабим» лойиҳасида ҳам очиқлик, рақамлаштириш ва бевосита иштирок тамойилларига устувор аҳамият берилган. Жараён «Очиқ бюджет» портали орқали амалга оширилади, ҳар бир мактаб учун алоҳида мақсадли жамғарма шакллантирилади ҳамда ўқувчилар ўз мактабининг ривожи учун зарур бўлган йўналишларни танлаш жараёнида бевосита иштирок этади. Бу ёндашув ёш авлодда жамоавий масъулият, ташаббускорлик ва бюджет маблағларидан оқилона фойдаланиш кўникмаларини шакллантиришга хизмат қилмоқда.
 

Давра суҳбатида Россия томонининг ташаббусли бюджетлаштириш йўналишидаги тажрибаси ва амалий ёндашувлари юзасидан ҳам фикр алмашилди. Хусусан, фуқаролар иштирокини кенгайтириш, ташаббусларни қўллаб-қувватлаш ва уларни амалга ошириш самарадорлигини оширишга қаратилган ёндашувлар муҳокама қилинди. Шу билан бирга, турли мамлакатларда шаклланган амалиётларни ўрганиш ва уларни миллий шароитдан келиб чиқиб қўллаш масалаларининг долзарблиги қайд этилди.
 

Шунингдек, тадбир доирасида видеоконференция алоқа орқали Россия Федерациясининг Удмурт Республикаси, Красноярск ўлкаси ва Санкт-Петербург шаҳри, шунингдек, Қирғизистон Республикаси ҳамда Ўзбекистон Республикасидаги мактаб ўқувчилари иштирок этди.
 

Мулоқотда ўқувчилар ташаббусли бюджетлаштириш бўйича ўз мактабларида шаклланган амалиёт ва тажрибалар билан ўртоқлашиб, амалга оширилаётган ташаббуслар ҳамда ўқувчиларнинг жараёндаги иштироки юзасидан фикр алмашдилар. Мазкур мулоқот турли мамлакат ва ҳудудлардаги ёшлар ўртасида ўзаро тажриба алмашиш ва ташаббусли бюджетлаштириш бўйича илғор ёндашувларни ўрганиш учун самарали имконият яратди.
 

Давра суҳбатининг иккинчи қисмида иштирокчилар Миробод туманидаги 83- ва 56-мактабларга ташриф буюриб, таълим муассасаларида ташаббусли бюджетлаштириш механизмларининг амалий қўлланилиши билан яқиндан танишдилар. Ташриф давомида мактабларда амалга оширилган ташаббуслар, яратилган шароитлар ҳамда ўқувчиларнинг бюджет жараёнларидаги иштироки юзасидан фикр алмашилди.

Иқтисодиёт ва молия вазирлиги

Ахборот хизмати ва коммуникациялар бошқармаси