Россия Ғазначилиги билан аудиторлик фаолиятини давлат томонидан тартибга солиш масалалари муҳокама қилинди
2026-08-18 19:30:00 / Вазирлик янгиликлари
Учрашув давомида аудиторлик фаолиятини давлат томонидан тартибга солиш тизимини такомиллаштириш, ташқи назорат механизмларини ривожлантириш ва аудит соҳасида замонавий назорат воситаларини қўллашга оид долзарб масалалар муҳокама қилинди. Шунингдек, Россия Ғазначилигининг аудиторлик фаолияти устидан ташқи назоратни амалга ошириш амалиёти, унинг ҳудудий органлари фаолияти ва мазкур йўналишда шаклланган институционал механизмлар ҳақида маълумотлар тақдим этилди.
Томонлар, шунингдек, масофавий мониторингни амалга ошириш механизми ҳамда аудиторлар томонидан жиноий фаолиятдан олинган даромадларни легаллаштиришга қарши курашиш соҳасидаги қонунчилик талабларига риоя этилиши устидан назорат қилиш бўйича Россия тажрибасини кўриб чиқдилар.
Мулоқот якунларига кўра, аудиторлик фаолиятини тартибга солиш ва ташқи назорат соҳасидаги ҳамкорликни изчил давом эттириш, илғор тажрибаларни ўрганиш ва ўзаро тажриба алмашишни янада фаоллаштириш муҳим аҳамиятга эга экани таъкидланди.
Маълумот учун: 2023 йил 21 декабрь куни Ўзбекистон Республикаси Иқтисодиёт ва молия вазирлиги, унинг ҳузуридаги Ғазначилик хизмати қўмитаси ҳамда Федерал ғазначилик (Россия Ғазначилиги) ўртасида 2024–2026 йилларга мўлжалланган ҳамкорлик дастури тасдиқланган. Мазкур дастур аудиторлик фаолияти устидан давлат назорати ва аудиторлар томонидан жиноий фаолиятдан олинган даромадларни легаллаштиришга қарши курашиш соҳасидаги қонунчилик талабларига риоя этиш юзасидан тажриба алмашишга қаратилган қўшма тадбирларни қамраб олади.
Иқтисодиёт ва молия вазирлиги
Ахборот хизмати ва коммуникациялар бошқармаси