Ўзбекистон Республикаси Иқтисодиёт ва молия вазирлиги

Жорий йилнинг 7 июль куни нуфузли халқаро молия ва илмий-тадқиқот институтлари ҳамда консалтинг компаниялари вакилларини Тошкент шаҳрида бирлаштирган Халқаро шериклик ташаббуслари ҳафталиги доирасида “Барқарор иқтисодий тараққиёт: долзарб масалалар” мавзусидаги муҳокама сессияси бўлиб ўтди.

Унда, жумладан, Жаҳон Банки, БМТ Тараққиёт Дастури вакиллари, Полша, Сингапур, Румыниядан халқаро экспертлар ҳамда маҳаллий иштирокчилар Барқарор иқтисодий ўсишни таъминлашнинг муҳим йўналишлари ҳақида фикр юритди. Шунингдек, иштирокчилар хусусийлаштириш, рақамлаштириш, қолаверса, инфратузилма, тадбиркорлик ва инсон капиталини ривожлантириш, саноат трансформацияси ҳамда иқтисодий ўсишни таъминлашда рақобат сиёсатининг роли юзасидан муҳокама олиб бордилар.

Сессияда Ўзбекистон Республикаси Иқтисодиёт ва молия вазири ўринбосари Илҳом Норқулов, БМТТДнинг доимий вакили Матилда Димовска, Сингапур халқаро ҳамкорлик ташкилоти ижрочи директори Конг Вай Мун, Жаҳон Банкининг Европа ва Марказий Осиё минтақалари бўйича катта иқтисодчиси Пинар Яшар, Румыния Рақобат ташкилоти президенти Богдан Кирису, Халқаро эксперт Марек Грабарек ҳамда Вазирлар Маҳкамаси ҳузуридаги Макроиқтисодий ва ҳудудий тадқиқотлар институти директори Умид Абидхаджаев иштирок этдилар.

Тадбир бошида сессия модератори Фред Ҳаррисон иштирокчиларга бугунги кунда жаҳон иқтисодиётида кузатилаётган мураккабликлар ва мазкур шароитда Ўзбекистон иқтисодиётида эришилаётган натижалар тўғрисида ахборот тақдим этди.

Сўнгра Ўзбекистонда амалга оширилаётган ислоҳотлар, иқтисодий кўрсаткичлар ва истиқболдаги вазифалар тўғрисидаги тақдимот учун Иқтисодиёт ва молия вазири ўринбосари Илҳом Норқуловга сўз берилди.

У ўз тақдимотида глобал макроиқтисодий жараёнлардаги мураккабликлар, жумладан, юқори инфляция ва фоиз ставкалари, халқаро транспорт-логистика занжирларидаги узилишлар ҳамда ошиб бораётган энергия ресурслари шароитида Ўзбекистоннинг ўз олдига қўйган мақсадлари ва уларга эришиш бўйича амалга оширилиши белгиланган устувор вазифаларни сўзлаб ўтди. Шунингдек, Илҳом Норқулов "2022-2026 йилларга мўлжалланган Янги Ўзбекистоннинг тараққиёт стратегияси"да белгиланган Ўзбекистонни “ўртадан юқори даромадли” мамлакатлар гуруҳига кириши учун амалга ошириладиган муҳим ислоҳотлар йўналишларига алоҳида тўхталди.

Конг Вай Мун иштирокчиларни Сингапурнинг рақамли давлат хизматларини кўрсатиш тажрибаси ва рақамли трансформация жараёни билан таништирди.

Шундан сўнг Сингапур саноат трансформацияси дастури ва уни Ўзбекистон шароитида амалга ошириш истиқболлари юзасидан фикр алмашилди.

Марек Грабарек ўз нутқи давомида қуйидаги каби мавзуларни кўтарди:

•       хусусийлаштириш ва инфратузилмани ривожлантиришнинг барқарор ўсишни таъминлашдаги аҳамияти;

•       хусусийлаштириш жараёни ва мазкур йўналишда Польшанинг тажрибаси;

•       ижтимоий соҳа инклюзивлигини оширишда давлат-хусусий шериклик механизмининг ўрни;

•       Ўзбекистонда ДХШ механизмини кенг жорий этишнинг истиқболлари;

•       барқарор иқтисодий ривожланишга эришишда инфратузилманинг аҳамияти;

•       инфратузилма лойиҳаларини молиялаштиришдаги устувор вазифалар;

•       яшил, барқарор ва инклюзив тараққиётни таъминлашда инновацион инфратузилма лойиҳаларини амалга ошириш истиқболлари.

БМТТДнинг доимий вакили Матилда Димовска жамиятда аёлларнинг роли ва иқтисодий фаоллигини ошириш, инсон капиталини ривожлантириш, ҳамда БМТТД томонидан Ўзбекистонда амалга оширилаётган лойиҳалар ҳажми ва аҳамиятида алоҳида тўхталиб ўтди.

Жаҳон Банки мутахассислари томонидан барқарор ривожланиш мақсадларига эришишда халқаро ҳамкорлик ҳамда мазкур ташкилот билан биргаликда Ўзбекистонда амалга оширилаётган ижтимоий-иқтисодий лойиҳалар ва уларнинг натижадорлиги эътироф этилди.

Макроиқтисодий ва ҳудудий тадқиқотлар институти директори Умид Абидхаджаев мамлакатимиз иқтисодиётини ривожлантириш ва иқтисодий барқарорликни таъминлашда рақобатнинг ўрнига тўхталиб ўтиб, “Рақобат тўғрисида”ги қонун янги таҳрирда қабул қилинганлиги, ушбу Қонун билан рақобат соҳасидаги давлат сиёсатининг асосий йўналишлари белгиланганини таъкидлади. Шу билан бирга, янги таҳрирда қабул қилинган Конституцияда тадбиркорлар, ишбилармонлар учун кўплаб ҳуқуқий имкониятлар яратилгани, давлат ўз зиммасига бозор муносабатларини ривожлантириш, қулай инвестициявий ва ишбилармонлик муҳитини таъминлаш, ҳалол рақобат учун шарт-шароитлар яратиш бўйича мажбуриятлар олаётгани юзасидан фикр билдирди.

Муҳокама якунида иқлим ўзгаришига қарши курашиш шароитида инновацион иш ўринларини яратиш ва муқобил энергия ресурсларидан фойдаланишни кенгайтириш имкониятлари кўриб чиқилди. Сессия ОАВ вакиллари иштирокидаги савол-жавоблар билан якунланди.  

Иқтисодиёт ва молия вазирлиги

Жамоатчилик билан алоқалар бошқармаси