Ўзбекистон Республикаси Иқтисодиёт ва молия вазирлиги

Мазкур қарор рақамли бошқарувни ривожлантириш, молиявий муносабатларда шаффофликни ошириш, бизнес жараёнларини соддалаштириш, тадбиркорлик субъектларини қўллаб-қувватлаш ҳамда давлат молияси тизимида ҳисобдорликни кучайтиришга қаратилган.
 

Қарор билан, хусусан, гаров реестрини юритиш, электрон интеграция, биржа савдолари, тадбиркорлик субъектларининг барқарорлик рейтинги, бюджет ташкилотлари штат жадваллари ҳамда хомашёни чуқур қайта ишлаш фаолиятига оид тартиблар такомиллаштирилмоқда.
 

Гаров реестри бўйича тартиблар аниқлаштирилади
 

Қарорга мувофиқ, гаров реестрини юритиш, унда ёзувларни киритиш, фойдаланувчилар билан ишлаш, гаров ёзувларини излаш ҳамда кўчирмаларни олиш тартиблари янада аниқлаштирилмоқда.
 

Гаров реестри молиявий мажбуриятлар бўйича шаффоф маълумот алмашинувини таъминлашга хизмат қилади. Бу кредиторлар ва қарздорлар ўртасидаги муносабатларда аниқликни ошириш, гаровга оид маълумотлардан фойдаланишни соддалаштириш ва молиявий муносабатларда ишончни мустаҳкамлаш имконини беради.
 

Garov.uz ва ONE-ID интеграцияси кучайтирилади
 

Гаров реестрида шахсий кабинет очиш ва хизматлардан фойдаланиш жараёнида фойдаланувчи маълумотлари ONE-ID ҳамда “Электрон ҳукумат” тизими орқали автоматик шакллантирилиши назарда тутилмоқда.
 

Бу эса ортиқча ҳужжат алмашинувини камайтиради, фойдаланувчилар учун хизматлардан фойдаланишни соддалаштиради ҳамда рақамли давлат хизматлари самарадорлигини оширади.
 

Нотўғри маълумотлар бўйича эътироз билдириш имконияти яратилади
 

Гаров реестрига нохолис ёки нотўғри маълумот киритилган деб ҳисобланган ҳолатларда фойдаланувчи тегишли эътироз билдириш имкониятига эга бўлади.
 

Мазкур тартиб молиявий муносабатларда ишонч, аниқлик ва ҳуқуқий ҳимояни кучайтиришга хизмат қилади.

Биржа савдоларида нарх шаклланиши такомиллаштирилади
 

Қарор билан юқори ликвидли ва монополь турдаги маҳсулотларни биржа савдоларида сотиш тартибига ўзгартиришлар киритилиб, айрим маҳсулотлар бўйича бошланғич нархни аниқлаш механизмлари такомиллаштирилмоқда.
 

Ушбу ўзгаришлар бозор механизмларининг шаффофлигини ошириш, нарх шаклланишида аниқликни таъминлаш ҳамда саноат занжири барқарорлигини қўллаб-қувватлашга хизмат қилади.
 

Тадбиркорлик рейтингида янги бандлик кўрсаткичи инобатга олинади
 

Тадбиркорлик субъектларининг барқарорлик рейтингини баҳолашда битирувчилар бандлигини таъминлаш кўрсаткичи ҳам инобатга олинади.
 

Бунда битирувчилар бандлигини таъминлаш даражасига қараб қуйидаги баҳолаш мезонлари қўлланилади:
 

20 фоиз ва ундан юқори — 5 балл;
 

15–20 фоиз — 4 балл;
 

10–15 фоиз — 3 балл;
 

5–10 фоиз — 2 балл.
 

Мазкур ёндашув тадбиркорлик субъектларини ёш мутахассислар бандлигига ҳисса қўшишга рағбатлантиради.
 

Бюджет ташкилотлари штат жадвали тизимлаштирилади
 

Қарор билан бюджет ташкилотлари ходимларининг меҳнатига ҳақ тўлаш ва штат жадвалларини шакллантиришда ягона ёндашувларни қўллаш тартиби аниқлаштирилмоқда.
 

Бунда штат жадвали шакллари, бюджет ташкилотлари идентификация кодлари ҳамда гуруҳлар бўйича таснифлаш масалалари тизимлаштирилади.
 

Бу давлат молиясида тартиб, ҳисобдорлик ва шаффофликни кучайтиришга хизмат қилади.
 

Хомашёни чуқур қайта ишлаш қўллаб-қувватланади
 

Қарорда мис хомашёсини чуқур қайта ишлаш фаолиятини амалга оширувчи корхоналар рўйхатини шакллантириш, юритиш ва мониторинг қилиш тартибларини янгилаш масалалари ҳам назарда тутилган.
 

Хомашёни чуқур қайта ишлаш саноат салоҳиятини ошириш, қўшимча қиймат яратиш, юқори технологияли маҳсулотлар ишлаб чиқариш ва экспорт имкониятларини кенгайтиришда муҳим аҳамиятга эга.

Қарорнинг иқтисодий аҳамияти
 

Мазкур ўзгаришлар бизнес жараёнларини соддалаштириш, рақамли интеграцияни кучайтириш, давлат молиясида шаффофликни ошириш ҳамда иқтисодиётда қўшимча қиймат яратиш жараёнларини қўллаб-қувватлашга хизмат қилади.
 

Умуман олганда, қарор иқтисодиёт ва молия тизимида рақамли бошқарувни ривожлантириш, шаффоф тартибларни жорий этиш ва барқарор иқтисодий ўсишни таъминлаш йўлидаги муҳим қадам ҳисобланади.

Иқтисодиёт ва молия вазирлиги

Ахборот хизмати ва коммуникациялар бошқармаси