Ўзбекистон Республикаси Иқтисодиёт ва молия вазирлиги

Ўзбекистон Республикаси Президентининг 2025 йил 15-центабрдаги ПҚ-282-сонли «Молиявий ҳисобот тизимини халқаро талаб ва стандартларга мувофиқ такомиллаштириш чора-тадбирлари тўғрисида»ги қарори ижроси доирасида Иқтисодиёт ва молия вазирлиги 2026 йил 18 май куни Молиявий ҳисоботнинг халқаро стандартлари (МҲХС) бўйича кадрларни тайёрлаш ва профессионал сертификатлашнинг замонавий тизимини жорий этиш бўйича Сертификатланган дипломли бухгалтерлар халқаро ассоциацияси (Association of Chartered Certified Accountants – ACCA) билан янгиланган ўзаро англашув меморандумини имзолади.

Маълумот учун: Сертификатланган дипломли бухгалтерлар халқаро ассоциацияси (Association of Chartered Certified Accountants, АCCА) 1904 йилда ташкил этилган ва 1974 йилда Англия ва Уэлс қонунчилигига мувофиқ Қироллик хартиясига киритилган АCCА молия ва бухгалтерия ҳисоби соҳасидаги халқаро ташкилот бўлиб, 180 дан ортиқ мамлакатдаги 530 000 нафар талаба (номзод) ва 250 000 нафар аъзони профессионал бухгалтерларни бирлаштиради (https://www.accaglobal.com).

Меморандумни имзолашдан асосий мақсад МҲХС соҳасида малакали кадрлар тайёрлаш учун халқаро таълим стандартларини жорий этишга кўмаклашишдир. Янгиланган меморандум доирасида томонлар халқаро молиявий ҳисобот ва аудит стандартлари бўйича мутахассисларни тайёрлаш, ўқитувчилар малакасини ошириш, университет дастурларини аккредитация қилиш ва АCCА квалификациясини миллий таълим тизимига интеграция қилиш бўйича ҳамкорликни кенгайтиришга келишиб олди.

Вазирликнинг устувор йўналишларига мувофиқ, янгиланган Меморандум қуйидаги янги йўналишларда ҳамкорлик соҳаларини ўз ичига олади:

халқаро илғор тажриба ва АCCА методологиясига мувофиқ аудит сифати назорати тизимини ривожлантириш ва мустаҳкамлашни қўллаб-қувватлаш;

барқарорлик (sustainability) соҳасида компетенцияларни ривожлантириш ва халқаро барқарорлик ҳисоботлари стандартларини жорий этишни қўллаб-қувватлаш;

давлат органлари ходимлари учун ўқув ва касбий малака ошириш дастурларини ташкил этиш.

Ушбу Меморандум томонларнинг молиявий ҳисобот соҳасидаги стратегик ҳамкорлигини янги босқичга олиб чиқишни назарда тутади.

Таъкидлаш жоизки, Иқтисодиёт ва молия вазирлиги ҳамда АCCА ўртасидаги дастлабки ҳамкорлик бўйича 2020 йилдаги Меморандум доирасида халқаро профессионал таълим ва малака тизимини ривожлантириш бўйича қатор муҳим натижаларга эришилди.

Хусусан, 2020–2025 йиллар давомида жами 4200 дан ортиқ талабгорлар учун АCCА ташкилотининг тегишли фан ва сертификатлари учун имтиҳон топшириш ва ўқиш харажатлари бўйича 11,06 млрд сўм давлат буджетидан қоплаб берилди. Ҳамкорлик жараёнида 20 дан ортиқ ўқув марказлари халқаро аккредитациядан муваффақиятли ўтди. Бугунги кунда Республикада АCCА аъзо (Member ва Affiliate) мақомига эга мутахассислар сони – 123 нафар, dipIFR АCCА дипломига эга мутахассислар сони – 618 нафар, «МҲХС бўйича молиявий ҳисобот (FR)» фанидан имтиҳонни муваффақиятли топширганлар сони – 1157 нафар, «Аудит ва ишонч билдириш хизматлари (АА)» фанидан имтиҳонни муваффақиятли топширганлар сони – 439 нафар, жами 2 337 га яқин халқаро сертификатга эга мутахассислар мавжуд.

Томонлар янгиланган мазкур меморандум Ўзбекистонда молиявий ҳисобот ва аудит тизимини халқаро стандартларга мувофиқ ривожлантириш, юқори малакали мутахассислар сонини ошириш, инвестицион жозибадорликни янада мустаҳкамлаш ҳамда мамлакат иқтисодиётининг барқарор ўсишини таъминлашга хизмат қилишини таъкидлади.

Иқтисодиёт ва молия вазирлиги

Ахборот хизмати ва коммуникациялар бошқармаси