Рақамлаштиришга доир устувор лойиҳаларни амалга ошириш бўйича:

Иқтисодиёт ва молия вазирлигининг тегишли функция ва вазифаларини рақамлаштиришга қаратилган 4 та устувор лойиҳа амалга оширилди. Хусусан:

1) “Subsidiya.idm.uz” ахборот тизими

Ўзбекистон Республикаси Вазирлар Маҳкамасининг 2026 йил 19 февралдаги «Олий малака тоифасига (бош ўқитувчи лавозимига) эга бўлган педагогларни ижтимоий қўллаб-қувватлаш бўйича қўшимча чора-тадбирлар тўғрисида»ги 49-сон қарори ижросини таъминлаш мақсадида қайта молиялаштириладиган ипотека кредитлари бошланғич бадалининг 25 фоизини қоплаб бериш учун Давлат бюджетидан субсидия ажратиш тартиби жорий этилди.

Бунда:

– субсидия олиш учун аризалар Давлат хизматлари марказлари ва Ягона интерактив давлат хизматлари портали (кейинги ўринларда — ЯИДХП) орқали қабул қилиниши йўлга қўйилди;

– келиб тушган аризаларни белгиланган тартибда инсон омилисиз скорингдан ўтказиш  ва натижаси тўғрисида хабар бериш тизими ишлаб чиқилди;

– субсидияларни иштирок этувчи тижорат банкларининг буюртманомаларига асосан “subsidyplatform.mf.uz” тўлов платформаси орқали автоматик тарзда тўлаб бериш бўйича қўшимча ишлар амалга оширилди.

2) «E-Grant» ахборот тизими

Вазирлар Маҳкамасининг 2025 йил 29 январдаги 49-сон қарорига мувофиқ олий маълумотли кадрларга бўлган давлат буюртмасини электрон платформа орқали шакллантириш (давлат буюртмасини шакллантиришда маълумотларни жамлаш, қайта ишлаш ва иш берувчиларнинг олий маълумотли кадрларга бўлган эҳтиёжини аниқлаш) мақсадида «E-Грант» ахборот тизими ишлаб чиқилди.

3) «E-Кузатув кенгаши» ахборот тизими

Иқтисодиёт ва молия вазирлиги акциядори ҳисобланган йирик давлат корхоналарида корпоратив бошқарувни такомиллаштириш мақсадида кузатув кенгашлари фаолиятини рақамлаштириш мақсадида кузатув кенгашлари фаолиятининг барча жараёнларини қамраб оладиган «Электрон Кузатув кенгаши» махсус ахборот тизими ишлаб чиқилди.

4) «Open-budjet» ахборот тизими

а) Ахборот тизими таркибида депутат ташаббуси асосида молиялаштириладиган лойиҳалар учун алоҳида саҳифа ташкил этилди ва шу турдаги барча лойиҳаларнинг жамоатчилик учун очиқ рўйхатини юритиш жорий қилинди;

б) «Ташаббусли бюджет» жараёнида лойиҳаларни шерикчилик асосида молиялаштириш амалиётини жорий этилди ва лойиҳалар ахборот тизими билан қамраб олинди;

в) «Ташаббусли бюджет» жараёнларида овоз беришда иштирок этган фуқаролар тўғрисида маълумотларни ўз ичига олган «овоз берувчилар портрети» маълумотлар базасини ишга туширилди.

Сунъий интеллект (AI) технологияларини жорий қилиш бўйича:

Иқтисодиёт ва молия вазирлигида сунъий интеллект ташаббусларини тизимли мувофиқлаштириш ҳамда стратегик ривожлантириш мақсадида «Сунъий интеллект технологияларини жорий қилиш жараёнларини жадаллаштириш юзасидан Ишчи гуруҳ» ташкил этилди. Мазкур ишчи гуруҳ таркибига ушбу йўналиш бўйича тегишли мутахассислар, жумладан AI Project Manager, AI Engineer, MLOps mutaxassisi, Network Administrator ҳамда System Administrator жалб этилди.

1) Иқтисодиёт ва молия вазирлиги фаолиятига оид келиб тушаётган мурожаатларни тезкор, аниқ ва самарали кўриб чиқиш ҳамда вазирликда жорий этилган ахборот тизимлари фойдаланувчиларига маслаҳат хизматини кўрсатиш мақсадида сунъий интеллект технологияларига асосланган “AI-assistant” тизими ишлаб чиқилди.

Мазкур тизим норматив-ҳуқуқий ҳужжатлар ҳамда очиқ маълумотлар асосида ўқитилиб, дастлаб «Очиқ бюджет» портали фаолиятига синов тариқасида жорий этилди.

Бундан ташқари, ҳозирда ЧатБот тизимининг буджет буюртмачиларига давлат харидлари бўйича амалий кўрсатмалар берувчи “G‘azna AI” модули ишлаб чиқилиб, ғазначилик ва давлат харидлари соҳасидаги амалдаги норматив-ҳуқуқий ҳужжатлар асосида ўқитилди ҳамда модули фаолиятини «УзАСБО» дастурий мажмуасида синов тариқасида жорий этилди.

2) Ҳудудлар кесимида макроиқтисодий ҳамда корхона даражасидаги кўрсаткичларни комплекс таҳлил қилиш, ҳудудий ўсиш нуқталарини аниқлаш ва фойдаланувчиларни сифатли таҳлилий маълумотлар, прогнозлар ҳамда тавсиялар билан таъминлаш орқали бошқарув қарорларини қўллаб-қувватлаш мақсадида «IM AI» таҳлил тизими (ai.imv.uz) ишлаб чиқилди ҳамда синов тариқасида амалиётга жорий этилди.

Бизнес жараёнларни рақамлаштириш соҳасида:

«Вазирликнинг иқтисодиёт йўналишидаги вазифа ва функцияларини аудитдан ўтказиш, бизнес жараёнларини мақбуллаштириш, реинжиниринг ва автоматлаштириш имкониятларини баҳолаш» лойиҳаси бошланди.

Ҳозирда 15 га яқин таркибий тузилма ва тизим ташкилотлари билан интервьюлар ташкил этилди. Лойиҳа доирасида жараёнларнинг самарадорлигини ошириш мақсадида ортиқча бўғинлар ва такрорланувчи функциялар аниқланиб, уларни оптималлаштириш ва рақамлаштириш бўйича асосланган таклифлар ишлаб чиқиш мақсад қилинган.

Иқтисодиёт ва молия вазирлиги

Ахборот хизмати ва коммуникациялар бошқармаси