Ўзбекистон Республикаси Иқтисодиёт ва молия вазирлиги

Юқори савияда ташкил этилган анжуман давлат харидлари тизимини модернизация қилиш ва рақамлаштириш асосида шаффоф, шунингдек, самарали бошқарув механизмларини жорий этиш, экологик барқарорликни таъминлашга қаратилган “яшил” харидлар амалиётини кенгайтириш, соҳада малакали кадрларни тайёрлаш, уларнинг илғор компетенциясини шакллантириш ҳамда инновацион таълим моделларини жорий этиш масалаларига бағишланди.
 

Конференция давлат бошқаруви органлари, илмий доиралар ва халқаро ҳамжамият вакиллари ўртасида очиқ мулоқот платформасини яратиб, илғор тажриба ва илмий ёндашувлар алмашинуви учун муҳим майдон вазифасини ўтади. Тадбирда  Ўзбекистон Республикаси Иқтисодиёт ва молия вазири ўринбосари, Рақобатни ривожлантириш ва истеъмолчилар ҳуқуқларини ҳимоя қилиш қўмитаси раиси ўринбосари, Коррупцияга қарши курашиш агентлиги масъул ходимлари, Экология ва иқлим ўзгариши миллий қўмитаси вакиллари, “Лойиҳалар ва харидлар самарадорлигини ошириш маркази” давлат муассасаси раҳбарлари, Саноат кооперацияси ва давлат харидлари агентлиги мутахассислари, халқаро молиявий ташкилотлар экспертлари ҳамда халқаро молиявий институтлардан вакиллар, шунингдек, олий таълим муассасалари профессор-ўқитувчилари, ёш илмий тадқиқотчилар ва соҳада фаолият олиб борувчи масъул шахслар иштирок этди.
 

Анжуманда давлат харидлари тизимини такомиллаштиришнинг институционал ва ҳуқуқий асослари, “яшил” харидлар мезонларини жорий этишнинг назарий ва амалий жиҳатлари, миллий экологик ёрлиқ тизимини ривожлантириш, рақамли технологиялар, жумладан, сунъий интеллект воситаларини қўллаш орқали харид жараёнларининг шаффофлиги ва самарадорлигини ошириш масалалари кенг муҳокама қилинди.
 

Хусусан, иштирокчилар томонидан олиб борилган маърузаларда экологик мезонларга асосланган харидлар тизими атроф-муҳитни муҳофаза қилиши билан бирга, узоқ муддатли иқтисодий самарадорликни таъминлашда ҳам муҳим омил эканлиги илмий асосланган ҳолда ёритиб берилди. Шу билан бирга, рақамли трансформация жараёнлари давлат харидлари тизимини инсон омилидан келиб чиқадиган хатарлардан холи этиш, коррупсиявий омилларни қисқартириш ва реал вақт режимида мониторинг имкониятларини кенгайтиришга хизмат қилиши алоҳида қайд этилди.
 

Конференция доирасида давлат харидлари тизими учун юқори малакали кадрлар тайёрлаш, замонавий билим ва кўникмаларни ривожлантириш, инновацион таълим моделларини амалиётга кенг жорий этиш масалаларига алоҳида эътибор қаратилди. Шунингдек, давлат харидлари соҳасида олиб борилаётган ислоҳотларни чуқур таҳлил қилиш, мавжуд муаммоларни аниқлаш ва уларнинг илмий асосланган ечимларини ишлаб чиқиш нуқтаи назаридан муҳим аҳамият касб этади.
 

Ташкил этилган анжуманнинг асосий мақсади давлат харидлари тизимини комплекс такомиллаштириш орқали бюджет маблағларидан фойдаланиш самарадорлигини ошириш, барқарор иқтисодий ривожланиш ва экологик мувозанатни таъминлашга ҳисса қўшишдан иборат.

Иқтисодиёт ва молия вазирлиги

Ахборот хизмати ва коммуникациялар бошқармаси