Ўзбекистон Республикаси Иқтисодиёт ва молия вазирлиги

Мазкур қарор ижросини таъминлаш мақсадида Иқтисодиёт ва молия вазирлиги МҲХСни жорий этиш бўйича ваколатли орган сифатида МҲХСни амалиётга қўллаш жараёнини мувофиқлаштириш мақсадида МҲХС Фонди билан МҲХС ҳужжатларини давлат тилига таржима қилиш ҳуқуқини олиш учун битим имзолади. Жами 62 та МҲХС ҳужжати давлат тилига таржима қилиниб, бугунги кунда ташкилотлар Ўзбекистон Республикаси ҳудудида қўллаш учун тан олинган молиявий ҳисоботнинг халқаро стандартлари ва унга тушунтиришлар матни (2022 йил 9 декабрь, рўйхат рақами: 3400) асосида бухгалтерия ҳисобини ташкил этиб, молиявий ҳисоботларини тайёрлаб келмоқда.

Шунингдек, вазирлик Сертификатланган дипломли бухгалтерлар халқаро ассоциацияси (АCCА, Буюк Британия) билан халқаро таълим стандартлари асосида МҲХС бўйича кадрлар тайёрлашга қаратилган меморандум имзолади. АCCА билан ўзаро ҳамкорлик жараёнида 19 дан ортиқ ўқув марказлари халқаро аккредитациядан муваффақиятли ўтди. Бу эса МҲХСга мувофиқ ўқитиш сифатини тасдиқлайди.

МҲХС бўйича мутахассисларнинг меҳнат бозорига кириши учун шарт-шароитларни яхшилаш мақсадида:

вазирлик томонидан олий таълим муассасаларининг педагог кадрлари ва талабалари, давлат органи ходимларининг МҲХСга ўқитиш ва бухгалтерларнинг халқаро сертификатлари доирасида дастлабки рўйхатдан ўтиш ва имтиҳон топшириш учун рўйхатдан ўтиш харажатларини қоплаб бериш тизими жорий этилди (бугунги кунга қадар 2 405 нафар талабгорга 5 910,8 млн сўм қоплаб берилди);

бугунги кунда бухгалтерларни халқаро сертификатлаш доирасида АССА – 71 та, “МҲХС бўйича молиявий ҳисобот” (F7) фанидан топширган – 302 та, DipIFR (ACCA) – 432 та, CIPA, CPA – 60 дан ортиқ, жами 865 га яқин халқаро сертификатга эга мутахассислар мавжуд.

13 мингдан ортиқ тингловчилар (талабалар, ўқитувчилар, бухгалтерлар ва молиячилар) учун бепул масофадан таълим онлайн платформалари (ifrs.academy ва profimsfo.uz) яратилди;

молиявий ҳисобот ва аудитнинг халқаро стандартлари бўйича инновацион малака ошириш ресурс маркази, шунингдек, Бухгалтерия ҳисоби ва солиқлар бўйича нодавлат малака ошириш ресурс маркази ташкил этилди;

МҲХСни ўзбек тилидаги аҳамиятини янада ошириш учун стандартлар бўйича бугунги кунга 30 та бепул онлайн вебинар ўтказилди.

Шу билан биргаликда, бухгалтерия ҳисоби соҳасини тизимлаштириш, Молиявий ҳисоботнинг халқаро стандартларига (МҲХС) ўтишни рағбатлантириш ва тадбиркорлик субъектларининг МҲХСга ўтиши учун қўшимча шарт-шароитлар яратиш, молиявий ҳисоботнинг ташқи сифат назорати тизимларини такомиллаштириш, шунингдек, бухгалтерлар ва аудиторлар касбининг ҳуқуқий мақоми ва нуфузини мустаҳкамлаш, уларнинг касбий одоб-ахлоқ талабларига риоя қилиши, бухгалтерлик ва аудиторлик хизматлари сифатини халқаро стандартлар асосида таъминлаши, бухгалтерия ҳисоби ва аудит соҳасини рақамлаштириш орқали ривожлантириш бугунги кундаги долзарб масалалар ҳисобланади.