«Йирик давлат корхоналарида рақамлаштириш жараёнлари ва ИТ-тизимларни Ягона трансформация платформасига интеграция қилиш» мавзусида семинар ўтказилди
2026-04-27 16:00:00 / Вазирлик янгиликлари
Семинарда Ўзбекистоннинг йирик давлат компаниялари, халқаро ташкилотлар вакиллари ҳамда SAP, 1C, IFS ва AVEVA каби етакчи халқаро ва маҳаллий компанияларнинг экспертлари иштирок этди. Тадбир давомида рақамлаштириш ва ERP-тизимларни жорий этишга доир замонавий ечимларга бағишланган тақдимотлар намойиш этилди.
Тадбир доирасида йирик давлат корхоналарида рақамли трансформацияни амалга ошириш, замонавий IТ-ечимларни жорий этиш, шунингдек, уларни Ягона трансформация платформаси билан интеграциялаш масалалари муҳокама қилинди.
Ўзбекистон Республикаси Президентининг 2025 йил 18 ноябрдаги Ф-59-сонли фармойиши ижросини таъминлаш мақсадида давлат компаниялари зиммасига рақамлаштириш жараёнларини фаоллаштириш, бошқарув самарадорлигини ошириш ва замонавий ахборот тизимларини жорий этиш бўйича аниқ вазифалар юклатилган.
Кадрлар салоҳиятини ривожлантиришга доир ташаббусларга алоҳида эътибор қаратилди: «UzAssets» АЖ саноатни рақамлаштириш бўйича жаҳон етакчилари билан ҳамкорликда IТ, сунъий интеллект, ERP ва роботлаштириш соҳаларида миллий мутахассисларни тайёрлашга йўналтирилган малака марказини яратиш лойиҳасини амалга оширмоқда.
Шунингдек, Ўзбекистоннинг йирик давлат корхоналарида ERP-тизимларини жорий этиш бўйича амалий тажрибаларга алоҳида урғу берилди. Семинар иштирокчилари ўзаро тажриба алмашиб, рақамли технологиялар ёрдамида бошқарув самарадорлигини оширишнинг амалий ёндашувларини кўриб чиқди.
Семинар якунида «UzAssets» АЖ ва SAP компанияси ўртасида Ўзбекистон давлат компанияларида рақамли трансформация соҳасида ҳамкорликни ривожлантириш ва қўшма лойиҳаларни амалга оширишга қаратилган ҳамкорлик меморандуми имзоланди.
Иқтисодиёт ва молия вазирлиги
Ахборот хизмати ва коммуникациялар бошқармаси