Ўзбекистон Республикаси Иқтисодиёт ва молия вазирлиги

Ташриф давомида ходимлар  малакали гид ҳамроҳлигидаги ахборот-танишув экскурциясининг дастлабки босқичида Марказда инсон цивилизациясининг тош давридан бошлаб бугунги кунгача бўлган ривожланиш даврлари замонавий ёндашув асосида ёритилганлигининг гувоҳи бўлишди. Бу эса ташриф буюрувчиларга инсоният тараққиётини яхлит ва тизимли равишда англаш имконини берди.
 

 Экскурция мобайнида ислом цивилизациясининг кўп асрлик тарихи, инсоният тараққиётининг илк босқичларидан тортиб то бугунги кунгача бўлган ривожланиш йўли ҳақида батафсил маълумотларга эга бўлдилар. Шунингдек, Марказда яратилган шароитлар, бой экспозициялар ва янги ташаббуслар, айниқса, буюк шахсларнинг соҳибқирон Амир Темур, Алишер Навоий, Заҳириддин Муҳаммад Бобур, Абу али Ибн Сино ва бошқа алломаларнинг ҳаёти ва фаолиятига бағишланган бўлимлар иштирокчиларда катта қизиқиш уйғотди. Уларнинг жаҳон илм-фани ва маданиятига қўшган улкан ҳиссаси замонавий технологиялар асосида таъсирчан тарзда намойиш этилгани алоҳида эътирофга сазовор.
 

Марказ қадимий ва миллий меъморчилик анъаналари асосида қурилган бўлиб, темурийлар даври кулолчилик намуналари, Амир Темур даврида кўчирилган йирик Умар Ақтў Қуръонининг парчалари, темурийлар даври архитектура ёдгорликларига тегишли кошин бўлаклари, бобурийлар даврига мансуб қурол-аслаҳа, дубулға, қалқон, қилич ва совут парчалари ҳақида ҳам батафсил маълумот берилди. Эътиборли жиҳати, Марказдаги интерактив экспозициялар орасида Буюк Ипак йўлининг тарихи ва унинг цивилизациялар тараққиётидаги ўрнига бағишланган бўлимидаги  савдо йўллари, маданиятлар алмашинуви ва халқлар ўртасидаги алоқалар замонавий мультимедиа воситалари орқали жонли тарзда ёритилгани ташриф буюрганларда катта таассурот қолдирди. 
 

Шу билан бирга, экспозицияларда Янги Ўзбекистон тараққиётига алоҳида эътибор қаратилган. Унда мамлакатимизда амалга оширилаётган ислоҳотлар, халқаро майдонда қўлга киритилаётган ютуқлар, жумладан, спорт бўйича олимпиада ғолиблари ҳақида интерактив маълумотлар тақдим этилган. Шунингдек, Янги Ўзбекистоннинг истиқболли тараққиёт йўналишлари, замонавий архитектура ва инновацион технологияларни ўз ичига олган макетлари  ўзига хос замонавий ёндашувни намоён этган.
 

Маълумот учун қайд этиб ўтиш жоизки, Ислом цивилизацияси маркази майдони ва қамровига кўра, дунёда ислом тарихи, маданияти ва цивилизацияларини ўрганиш ҳамда тарғиб этишга қаратилган йирик мажмуалардан бири ҳисобланади. У Тошкентнинг машҳур Ҳазрати Имом мажмуаси ҳудудидаги 10 гектар майдонда барпо этилган. Бино уч қаватдан иборат бўлиб, узунлиги 161 метр, эни 118 метрни ташкил этади. Гумбазининг баландлиги 65 метр, умумий фойдаланиш ҳудуди эса 42 минг квадрат метрдан зиёд. Марказда, шунингдек:

 • ноёб қўлёзмалар ва қадимий манбалар;
 

 • уларни сақлаш ва реставрация қилиш жараёнлари;
 

 • рақамлаштириш ва илмий тадқиқот ишлари;
 

 • замонавий мультимедиа ва виртуал экспозициялар билан танишиш имконияти яратилган.

Ташриф иштирокчилари Маънавий саёҳат давомида ташриф иштирокчилари, нафақат, буюк саркарда ва давлат арбоби Амир Темур бобоколонимиз ҳаёти ва фаолияти, унинг бой тарихий мероси ҳамда давлатчилик анъаналари билан яқиндан танишиб,  янги билимларга эга бўлдилар, балки маънавий жиҳатдан бойиб, миллий меросимизга бўлган ҳурмат ва ифтихор туйғулари янада мустаҳкамланди.
 

Таъкидлаш жоизки, бу каби маънавий-маърифий ташрифлар давлат хизматчиларида миллий қадриятларга садоқат, тарихий меросга эҳтиром ва маънавий баркамолликни юксалтиришда муҳим аҳамият касб этади.