Ички ва ташқи давлат аудитини ривожлантириш, бюджет жараёнини такомиллаштириш масалаларига бағишланган семинар бўлиб ўтди
2024-06-06 20:20:00 / Вазирлик янгиликлари
Ўзбекистон Иқтисодиёт вазирлиги томонидан семинарда Давлат органларининг ички аудит тузилмалари фаолиятини ривожлантириш ва мувофиқлаштириш бошқармаси бошлиғи Азамат Жабборов ва бошқарма ходимлари, Ўзбекистон Иқтисодиёт вазирлиги ҳузуридаги Молия органлари ҳамда бюджет ташкилотларининг молия-ҳисоб бўлинмалари ходимларини тайёрлаш ва қайта тайёрлаш ўқув маркази директори Ирода Ҳамидова, Ўзбекистон Иқтисодиёт вазирлиги ҳузуридаги бюджетдан ташқари пенсия жамғармаси ходимлари ва Бюджет-солиқ илмий тадқиқотлар институти ходимлари иштирок этдилар.
Икки томонлама дастур эксперти Светлана Табалина «Ташқи ва ички давлат молиявий назорати ва аудит органларининг ўзаро таъсирининг халқаро стандартлари» тақдимоти билан сўзга чиқди. Ўз тақдимотида 2025 йилда кучга кирадиган янги халқаро аудит стандартларини батафсил таҳлил қилди.
Шунингдек, ҳозирги кунда амалда бўлган INTOSAI стандартлари ва қўлланмалари ҳамда уларнинг Ўзбекистон Республикаси Иқтисодиёт ва Молия вазирлиги учун амалий фойдалари кўриб чиқилди. Шунингдек, семинарда давлат аудитининг органлари ва ички аудиторлар ўртасидаги ҳамкорликнинг таъсири, уларнинг юзага келиши мумкин бўлган хатарлари ва ўзаро таъсир шакллари кўриб чиқилди.
Куннинг иккинчи ярмида Россия Федерацияси Молия вазирлиги илмий тадқиқот институти маслаҳатчиси Игор Ковтун модераторлигида “Ўзбекистон Республикасида дастурий бюджетлаштириш тизимини жорий этишни такомиллаштириш” мавзусида семинар бўлиб ўтди.
Томонлар Ўзбекистонда дастурий бюджетлаштиришни амалга ошириш бўйича эришилган натижаларни муҳокама қилдилар. Бунда, Иқтисодиёт ва молия вазирлиги Давлат бюджети сиёсати департаменти Бюджет харажатлари самарадорлигини баҳолаш ва бюджетни режалаштиришнинг дастурий мақсадли услубларини жорий этиш бўлими бошлиғи Шерхон Сайфутдинов дастурий бюджетлаштириш тизимини самарали жорий этиш бўйича “Йўл харитаси” ишлаб чиқилганлигини, унда 2030 йилгача аниқ вазифалар белгиланганлигини таъкидлаб ўтди.
Шунингдек, ушбу тизимни такомиллаштириш бўйича Ўзбекистон Республикаси Вазирлар Маҳкамасининг 2024 йил 4 январида “Ўзбекистон Республикасида дастурий бюджетлаштириш тизимини жорий этишда бюджет маблағларини тақсимловчиларнинг бюджет дастурларини ишлаб чиқиш, мониторингини юритиш ва уларнинг самарадорлигини баҳолаш тартиби тўғрисидаги низомни тасдиқлаш хакида” 4-сонли қарори қабул қилинганлиги ва мазкур низомга мувофиқ 2025 йил учун Иқтисодиёт ва Молия вазирлиги ҳамда Қишлоқ хўжалиги вазирлигининг бюджет харажатларини бюджет дастурлари кесимида ишлаб чиқилганлиги ва келгуси йил учун Фискал стратегияда акс эттирилганлигини таъкидлади.
Шундан сўнг, Россия Федерацияси Молия вазирлиги илмий тадқиқот институти эксперти Леонид Богданов “Ўзбекистон Республикасида Дастурий бюджетлаштириш тизими натижаларини мониторинг қилиш ва баҳолашнинг замонавий тенденцияларини жорий этиш ва ҳал қилиниши керак бўлган вазифалар” мавзусида тақдимот қилди.
Семинар якуни бўйича:
Ўзбекистон Республикасида дастурий бюджетлаштириш тизимини такомиллаштириш чора-тадбирлари режаси;
Иқтисодиёт ва молия вазирлиги ва бошқа манфаатдор вазирликлар ходимларини дастурий бюджетлаштириш тизимини такомиллаштириш юзасидан институтционал салоҳиятларини ошириш юзасидан ўқув дастурини муҳокама қилиш ҳамда хамкорлик доирасида амалга ошириладиган ишлар келишиб олинди.