Ўзбекистон-Туркия бизнес форуми доирасида “Ostim” билан учрашув бўлиб ўтди
2024-06-05 17:10:00 / Вазирлик янгиликлари
Учрашувда темир йўл тизимлари, алоқа ва каучук технологиялари ҳамда энергетика каби турли соҳаларда кенг ҳамкорлик қилиш имкониятлари кўриб чиқилди.
Маълумот учун: 1967 йилда ташкил этилган “Ostim” компанияси Анқарадаги етакчи саноат зоналаридан бири сифатида тан олинган уюшган саноат зонасидир. У мудофаа, авиация, темир йўл тизимлари, тиббиёт, алоқа технологиялари, энергетика ва каучук технологиялари каби 139 та компания ва 17 та соҳа бўйича 6200 дан ортиқ тадбиркорни қўллаб-қувватлайди. “Ostim” компаниясининг йиллик экспорт ҳажми 1,5 миллиард долларга баҳоланади.
Учрашувда саноат зоналарини ривожлантириш бўйича ҳамкорликнинг истиқболли йўналишлари муҳокама қилинди. Томонлар Ўзбекистонда янги саноат зоналарини яратишда “Ostim” компаниясининг тажрибаси ва ресурсларидан фойдаланиш имкониятларини кўриб чиқдилар. Остим кўмагида мамлакатимизда саноат зоналари сони кўпайиши кутилмоқда, бу эса Ўзбекистоннинг саноат салоҳиятини сезиларли даражада оширади ва иқтисодиётнинг турли тармоқларида иқтисодий ўсишга хизмат қилади.
Хулоса ўрнида шуни таъкидлаш жоизки, мазкур ҳамкорлик инновацияларни рағбатлантириш, янги иш ўринлари яратиш ва Ўзбекистон ва Туркия ўртасидаги икки томонлама иқтисодий алоқаларни мустаҳкамлашга қаратилган.
Иқтисодиёт ва молия вазирлиги
Ахборот хизмати