Ўзбекистон Республикаси Иқтисодиёт ва молия вазирлиги

Мазкур қарор ижроси юзасидан 2020–2025 йиллар давомида вазирлик томонидан жами 4200 дан ортиқ талабгорлар учун 11,06 млрд сўм миқдорида ўқитиш ва имтиҳон топшириш харажатлари қоплаб берилди. Шундан бухгалтерия ҳисоби соҳасидаги халқаро ташкилотнинг аккредитациясидан ўтган ўқув марказлари томонидан МҲХС бўйича ўқитилган 2027 нафар талабгорнинг 7,7 млрд сўм ўқитиш харажатлари қоплаб берилган.

Шунингдек, бухгалтерларни халқаро сертификатлаш доирасида имтиҳон топшириш харажатларини қоплаш юзасидан талабгорлар томонидан келиб тушган аризаларнинг 2210 таси бўйича 3,4 млрд сўмга яқин харажатлар қоплаб берилди.

Мазкур амалиёт натижасида бугунги кунга қадар 671 нафар талабгор имтиҳонларни муваффақиятли топширган. Шундан, 564 нафари «МҲХС бўйича молиявий ҳисобот» (FR), 86 нафари «Аудит ва ишонч билдириш хизматлари» (АА) ва 21 нафари “Халқаро молиявий ҳисобот бўйича диплом (DipIFR АCCА) фанлари бўйича имтиҳонларни муваффақиятли топширган.

Маълумот учун: Бугунги кунда Ўзбекистон Республикасида Сертификатланган дипломли бухгалтерлар халқаро ассоциациясига (АCCА) аъзо (Member ва Affiliate) мақомига эга мутахассислар сони 123 нафар, DipIFR АCCА дипломига эга мутахассислар сони 618 нафар, «МҲХС бўйича молиявий ҳисобот (FR)» фанидан имтиҳонни муваффақиятли топширганлар сони 1157 нафар, «Аудит ва ишонч билдириш хизматлари (АА)» фанидан имтиҳонни муваффақиятли топширганлар сони 439 нафарни ташкил қилмоқда.

Ўзбекистон Республикаси Президентининг 2025 йил 15-центабрдаги ПҚ–282-сонли қарори билан бухгалтерларни халқаро сертификатлаш доирасида имтиҳон топшириш харажатларини қоплаш амалиётини 2026–2028 йилларда ҳам давом эттириш таклифи маъқулланди.

Мазкур қарор ижроси юзасидан Ўзбекистон Республикаси Вазирлар Маҳкамасининг «Бухгалтерларни халқаро сертификатлаш доирасида имтиҳонларни топшириш харажатларини қоплаш тартиби тўғрисидаги вақтинчалик низомни тасдиқлаш ҳақида»ги қарори лойиҳаси ишлаб чиқилди.

Янги тартибга кўра, бухгалтерларни халқаро сертификатлаш доирасида тегишли фанлардан имтиҳонни муваффақиятли топширган Ўзбекистон Республикасининг барча фуқароларига имтиҳон харажатлари давлат томонидан қоплаб берилиши назарда тутилмоқда.

Янги тартибнинг олдинги тартибдан аҳамияти шундаки, олдинги тартибда имтиёздан фақат ОТМ талабалари, битирувчилари, ОТМ педагог кадрлари ва давлат органи ҳодимлари фойдаланиш имконияти мавжуд бўлган бўлса, эндиликда барча фуқаролар, жумладан амалиётчи бухгалтер ва аудиторлар, солиқ маслаҳатчилари ва бошқа бухгалтерия ҳисоби ва аудит соҳасига алоқадор шахслар ушбу имкониятдан фойдаланиши мумкин.

Иқтисодиёт ва молия вазирлиги

Ахборот хизмати ва коммуникациялар бошқармаси