“Ernst & Young” аудиторлик компанияси халқаро вакиллари билан бухгалтерия ҳисоби ва аудит соҳасида халқаро ҳамкорликни ривожлантириш масалалари муҳокама қилинди
2026-01-28 16:00:00 / Вазирлик янгиликлари
Мазкур учрашув давомида сўнгги йилларда бухгалтерия ҳисоби ва аудит соҳаларида амалга оширилаётган тизимли ислоҳотлар, Молиявий ҳисоботнинг халқаро стандартлари (МҲХС, IFRS)ни жорий этишнинг янги босқичи, шунингдек, аудиторлик соҳасини халқаро илғор тажрибалар асосида янада ривожлантириш масалалари муҳокама қилинди.
Томонлар аудиторлик ва молиявий ҳисобот соҳасида шаффофликни таъминлаш, инвесторлар ишончини мустаҳкамлаш ҳамда халқаро стандартларга мос тизимни шакллантириш йўлида амалга оширилаётган чора-тадбирларнинг аҳамиятини алоҳида таъкидлаб ўтдилар. Шу билан бирга, “Ernst & Young” аудиторлик компанияси вакиллари томонидан мамлакатимизда ушбу соҳада олиб борилаётган кенг кўламли ислоҳотлар эътироф этилди. Жумладан, Ўзбекистон Республикаси Президентининг 2025 йил 15 сентябрдаги PQ-282-сонли қарорида белгиланган вазифалар ва уларнинг ижроси доирасида амалга оширилаётган ишлар соҳани ривожлантиришга юқори даражада эътибор қаратилганини яққол ифодалаб бериши қайд этилди.
Шунингдек, аудиторлик ташкилотлари фаолияти сифати устидан назоратни таъминлаш, аудит хизматлари кўрсатишга доир масалалар юзасидан фикр алмашилди. Ушбу масалалар аудиторлик фаолиятида мустақиллик ва холисликни таъминлашга хизмат қилиши таъкидланди.
Учрашув якунида томонлар бухгалтерия ҳисоби ва аудит соҳаларини янада такомиллаштириш, халқаро ҳамкорликни кенгайтириш ҳамда соҳага замонавий ёндашувларни жорий этишда доимий ва самарали ҳамкорликни давом эттиришга тайёр эканликларини билдирдилар.
Иқтисодиёт ва молия вазирлиги
Ахборот хизмати ва коммуникациялар бошқармаси