Давлат харидлари тизимини янада такомиллаштириш мақсадида қабул қилинган Президент Фармонининг мазмун-моҳияти ҳудудларда кенг тушунтирилмоқда
2025-12-27 16:30:00 / Вазирлик янгиликлари
Мазкур учрашувлар Ўзбекистон Республикаси Президентининг 2025 йил 26 декабрдаги «Давлат харидлари тизимида рақобат муҳити ва шаффофликни таъминлаш бўйича навбатдаги чора-тадбирлар тўғрисида»ги 259-сонли Фармони мазмун-моҳиятини кенг тушунтириш, ҳужжат билан белгиланган устувор вазифалар ва амалий механизмларни батафсил шарҳлашга бағишланди.
Йиғилишлар давомида Фармон билан давлат харидлари тизимини тубдан такомиллаштириш, очиқлик ва рақобатни кучайтириш, маҳаллий ишлаб чиқарувчиларни қўллаб-қувватлаш ҳамда буджет маблағларидан самарали фойдаланишни таъминлашга қаратилган асосий мақсадлар белгилаб берилгани таъкидланди. Хусусан, босқичма-босқич равишда рақобатли харидлар улушини 80 фоизга, иқтисод қилинган маблағлар ҳажмини
25 триллион сўмга, харидларда маҳаллий маҳсулотлар улушини эса камида
85 фоизга етказиш режалаштирилган.
Шунингдек, Фармон доирасида давлат харидлари амалиётига қатор муҳим янгиликлар жорий этилмоқда. Жумладан, харидларда янги рақобатли усул — «таклиф сўрови» механизми йўлга қўйилади. Давлат буюртмачиларининг харид режалари эълон қилингач, ушбу маълумотлар маҳаллий ишлаб чиқарувчиларга электрон хабарнома орқали автоматик тарзда етказилади.
Бундан ташқари, маҳаллийлаштириш даражаси 30 фоиздан ортиқ бўлган маҳаллий корхоналарга аванс тўловларини уларнинг маҳаллийлаштириш даражасидан келиб чиқиб тўлашга рухсат этилиши, бюджет буюртмачилари ва маҳаллий ишлаб чиқарувчилар ўртасида маҳаллий аукцион савдоларини ташкил этиш тартиби жорий қилиниши қайд этилди.
Фармон билан давлат буюртмачиларининг товарларни, ишларни ва хизматларни қабул қилувчи шахсларга бериладиган ишончномаларни давлат харидларининг электрон тизими орқали электрон шаклда расмийлаштириш амалиёти йўлга қўйилмоқда. Харид ҳужжатларини экспертизадан ўтказиш муддатлари уларнинг қиймати ва мураккаблигига қараб қисқартирилади, барча харид ҳужжатлари лойиҳалари эса жамоатчилик муҳокамасидан ўтказилиши белгиланган.
Шу билан бирга, харидларда ўртача бозор нархларини автоматик ҳисобловчи электрон модуль ишга туширилиши орқали нархларнинг асоссиз оширилишининг олдини олиш ва молиявий интизомни кучайтириш кўзда тутилмоқда.
Якунда иштирокчилар томонидан Фармоннинг амалий ижроси, янги механизмларни жорий этиш жараёнлари ҳамда тизимнинг самарадорлигини оширишга доир саволлар муҳокама қилиниб, тегишли тушунтиришлар берилди.
Иқтисодиёт ва молия вазирлиги
Ахборот хизмати ва коммуникациялар бошқармаси