Бухорода “Ишонч” жамғармаси маблағлари ҳисобидан рақамли ва инклюзив таълимни ривожлантириш лойиҳалари натижаларига бағишланган матбуот анжумани ҳамда пресс-тур ўтказилди
2025-12-17 09:25:00 / Вазирлик янгиликлари
Эслатиб ўтамиз, бугунги кунга қадар “Ишонч” жамғармаси маблағлари ҳисобидан соғлиқни сақлаш (оналар ва болалар саломатлигини муҳофаза қилиш) ҳамда таълим (АКТ, инклюзив таълим, мактабларнинг санитария-гигиена ҳолатини яхшилаш ва иситиш тизимини модернизация қилиш) соҳаларида умумий қиймати 87 млн долларлик лойиҳалар ишга туширилган.
Мазкур пресс-тур доирасида Ромитан туманидаги 1-умумтаълим мактаби, Бухоро шаҳридаги 45-мактаб ҳамда вилоят Педагогик маҳорат марказида ўқувчи ва ўқитувчилар учун яратилган шарт-шароитлар ўрганилди.
Тадбир давомида делегация аъзоларига Педагогик маҳорат маркази фаолияти, хусусан, рақамли таълим ва СТЕМ муҳити ҳамда дарсларда замонавий технологияларни татбиқ этиш бўйича ўқитувчилар учун ташкил этилган каскад-тренинглар намойиш этилди.
Тадбирнинг кириш қисмида Бухоро вилояти ҳокими Ботир Зарипов, “Ишонч” жамғармаси бошқарув қўмитаси вакиллари, Мактабгача ва мактаб таълими вазири ўринбосари Азизбек Турғунбоев ҳамда Бухоро вилояти Педагогик маҳорат маркази директори сўзга чиқиб, лойиҳа доирасида бажарилган ишлар ва унинг таълим сифатига таъсирига тўхталиб ўтдилар.
Ташриф якунида ОАВ ҳамда жамоатчилик вакиллари иштирокида матбуот анжумани бўлиб ўтди. Унда Иқтисодиёт ва молия вазири ўринбосари Отабек Фазилкаримов, Швейцариянинг Ўзбекистондаги элчиси Константин Оболенский ҳамда БМТнинг Ўзбекистондаги доимий координатори Сабине Маҳл иштирок этиб, журналистлар ва фуқаролик жамияти вакилларининг саволларига жавоб бердилар.
Шунингдек, матбуот анжуманидан сўнг “Ишонч” жамғармаси бошқарув қўмитаси навбатдаги транш маблағлари ҳисобидан амалга ошириладиган лойиҳалар йўналишларини муҳокама қилди.
Мазкур ташриф “Ишонч” жамғармаси бошқарув қўмитаси ташаббуси билан амалга оширилиб, у лойиҳа доирасидаги ислоҳотларнинг амалдаги натижаларини намойиш қилишда ўзига хос платформа бўлиб хизмат қилди ҳамда қайтарилган маблағлар Ўзбекситон халқи манфаатлари йўлида ишлатилаётганини яна бир бор тасдиқлади.
Иқтисодиёт ва молия вазирлиги
Ахборот хизмати ва коммуникациялар бошқармаси