Фуқаролар осойишталиги, ҳуқуқбузарликлар профилактикаси ва самарали назорат учун янги замин: Фарғона вилояти ИИБ Иккинчи минтақавий ҳудуднинг замонавий мувофиқлаштириш маркази ишга туширилди
2025-08-09 07:00:00 / Янгиликлар
Маълумки, Ўзбекистон Республикаси Президентининг 2020 йил 1 декабрдаги “Фарғона водийсида ҳуқуқбузарликлар профилактикаси ва жиноятчиликка қарши курашиш соҳасида ички ишлар органлари куч ва воситаларини бошқаришнинг сифат жиҳатдан янги тизимини жорий этиш тўғрисида”ги қарори асосида Фарғона вилояти 19 та шаҳар ва туманларга бўлинган ҳолда икки минтақавий мувофиқлаштириш марказига ажратилган эди. Шу асосда ташкил этилган Иккинчи минтақавий марказ сўнгги йилларда вақтинча Қўқон шаҳар ИИБ маъмурий биносида жойлашган ҳолда фаолият юритиб келаётган эди.
Эндиликда мазкур марказ ходимлари барча замонавий талабларга жавоб берадиган, юқори қулайликларга эга, функционал жиҳатдан тўлиқ жиҳозланган мажмуада хизмат олиб боради.
Мажмуанинг тантанали очилиш маросимида Ички ишлар вазирлиги раҳбарияти, вилоят ҳокими ҳамда ИИБ масъуллари, ҳукумат вакиллари, ҳуқуқни муҳофаза қилиш органлар раҳбарлари, фахрийлар ҳамда жамоатчилик вакиллари иштирок этдилар.
Очилиш маросимида бинони барпо этишга ўзининг муносиб ҳиссасини қўшган қурувчи ва бунёдкорларга чуқур миннатдорчилик билдирилиб, эсдалик совғалари топширилди.
Тадбир жараёнида вилоят ҳудудида жиноятчиликни жиловлаш, фуқароларнинг конституциявий ҳуқуқларини ҳимоя қилиш ва юрт осойишталигини таъминлашда юксак касб маҳоратини намойиш этиб, зиммасидаги вазифаларни виждонан бажариб келаётган бир гуруҳ раҳбар ва ходимларга “Chevrolet Cobalt”, “BYD Chazor” каби 7 та замонавий русумдаги хизмат автомашиналарининг калитлари ҳамда ҳизмат жараёнида фойдаланиш учун турли анжомлар тантанали равишда топширилди.
Шундан сўнг рамзий лента қирқилиб, тадбир иштирокчилари янги мажмуада яратилган шарт-шароитлар билан яқиндан танишдилар.
Янги бино 2 та асосий бўлимдан иборат бўлиб, уларнинг бири назорат ўтиш пункти ва 3 қаватли маъмурий бинодан, иккинчиси эса кўп ўринли махсус қабулхонадан ташкил топган. Шунингдек, марказ таркибида тезкор вазифаларни бажариш учун сафарбарлик отрядига мўлжалланган алоҳида маъмурий иншоот ҳам мавжуд.
Шу билан бирга, хоналар замонавий рақамли технологиялар, техник воситалар ҳамда мебел жиҳозлари билан тўлиқ таъминланди. Марказ ҳовлиси ободонлаштирилиб, иккинчи минтақавий ҳудуддаги шаҳар ва туман ички ишлар бўлимлари ишини тезкор мувофиқлаштириш ва хизмат самарадорлигини ошириш учур зарур шарт-шароитлар яратилди. Барча куч ва воситаларни бир жойга жамлаган, яхлит замонавий бошқарув мажмуаси вужудга келди.
Янги мажмуанинг фаолият бошлаши нафақат ходимлар учун қулай ва замонавий меҳнат шароитларини яратади, балки бутун минтақада жамоат хавфсизлиги ва ҳуқуқбузарликлар профилактикаси самарадорлигини янада оширишга хизмат қилади. Бундай лойиҳалар — ҳуқуқ-тартибот органлари имкониятларини янада мустаҳкамлаш ва жамиятда тинчлик ҳамда барқарорликни таъминлашга қаратилган изчил ислоҳотларнинг амалий натижасидир.