Ўзбекистон Республикаси Ички ишлар вазирлиги

Ички ишлар органлари, ҳарбий тузилмалар ва таълим муассасаларида хизмат қилаётган азиз опа-сингилларимизни, фахрий аёлларимизни 8 март – Халқаро хотин-қизлар куни байрами билан самимий муборакбод этаман.

Сўнгги йилларда мамлакатимизда хотин-қизлар манфаатларини таъминлаш, жамият ҳаётидаги ўрнини мустаҳкамлаш давлатимиз ижтимоий сиёсатининг муҳим йўналишига айланди.

Янги Ўзбекистонни барпо этишда, Учинчи Ренессанс бунёдкори бўлган ёш авлодни тарбиялашда, биринчи навбатда, зукко ва меҳрибон аёлларимизга, уларнинг буюк мураббийлик фазилатларига таянмоқдамиз.

Дарҳақиқат, фарзандларимиз қалбига улуғ мақсадлар, олижаноб ғояларни сингдириш, уларни юксак фазилатли, мард ва жасур, ватанпарвар авлод сифатида тарбиялаб вояга етказиш мунис оналаримизга, аёлларга боғлиқ.

Муҳтарам Президентимиз Шавкат Миромонович Мирзиёев “Биз Ўзбекистонда қандай қонун ва қарорларни қабул қилмайлик, қандай ислоҳотларни ҳаётга жорий этмайлик, давлат раҳбари сифатида менинг кўз ўнгимда аввало мунис оналаримиз, меҳрибон опа-сингилларимиз сиймоси, уларнинг дарду ташвишлари туради”, дея алоҳида таъкидлаганлар.

Қадрли ходималар, азиз опа-сингиллар!

Мамлакатимизда амалга оширилаётган ислоҳотлар жараёнида, Ички ишлар органларида йигитлар билан бир сафда халқ манфаатлари йўлида садоқат билан хизмат қилаётган сиз каби фидойи аёлларнинг ҳам муносиб ўрнингиз бор.

Айниқса, профилактика, тергов, жиноят-қидирув, йўл ҳаракати хавфсизлиги, тиббий хизмат кўрсатиш ва маънавий-маърифий ишлар бўйича хизмат ва йўналишларда раҳбар аёллар сони кўпаймоқда. Бу ички ишлар органларининг янада самарали тузилмага айланишида муҳим аҳамият касб этади, албатта.

Муҳтарама аёллар, азиз опа-сингиллар, фурсатдан фойдаланиб, барчангизни ушбу айём билан яна бир бор табриклаб, Сизларга узоқ умр, сиҳат-саломатлик, бахт-саодат, хонадонларингизга файзу барака тилайман.

Вазир генерал-лейтенант
П.Р. Бобожонов