Ўзбекистон Республикаси Ички ишлар вазирлиги

Сўнгги йилларда Ўзбекистон Республикаси Ички ишлар вазирлиги ташаббуси билан кинология хизматини тубдан ислоҳ қилиш, хизмат итларини замонавий талабларга жавоб берадиган йўналишлар бўйича тайёрлаш ва улардан самарали фойдаланиш борасида бир қатор ислоҳотлар амалга оширилмоқда.

Жумладан, Ўзбекистон Республикаси Вазирлар Маҳкамасининг “Ички ишлар органларининг кинология хизматлари фаолиятини тубдан такомиллаштириш чора-тадбирлари тўғрисида”ги қарори асосида Яшнобод тумани Уйсозлар кўчасида уч гектар ер майдонида, Тошкент шаҳар ИИББ кинология хизмати учун хизмат итлари питомниги фойдаланишга топширилди.

Тантанали тадбирда Ички ишлар вазирлиги раҳбарияти, соҳа масъуллари, фахрийлар, шунингдек Миллий гвардия, Мудофаа вазирлиги, Божхона қўмитаси, Фавқулодда вазиятлар вазирлиги, Давлат хавфсизлиги хизмати ҳамда Президент давлат хавфсизлик хизмати кинология марказлари раҳбарлари иштирок этдилар.

Кинология маркази икки қаватли маъмурий бино ва қўшимча бешта блокдан иборат. Маъмурий бинода навбатчилик қисми, кинолог мутахассисларнинг хизмат фаолияти, назарий машғулотлар ўтказиш ва махсус воситаларни сақлаш учун хоналар жойлашган. Биринчи блок махсуслаштирилган транспорт воситаларини сақлаш учун мўлжалланган бўлса, қолган блокларда хизмат итларини сақлаш, парваришлаш, чўмилтириш, машғулот ўтказиш, уларга ветеринария хизматини кўрсатиш учун алоҳида волъерлар ва бошқа хизмат хоналари жойлашган.

Шунингдек марказ, хизмат итларидан сифатли насл олиш, уларни гиёҳванд моддалар ва портловчи буюмларни топишга тайёрлаш, ногирон фуқароларга кўмак кўрсатиш ва бошқа йўналишларга ихтисослашган бўлиб, бу борада етакчи мутахассислар жалб этилган.

Тадбир иштирокчилари халқаро андозалар асосида янги қурилган Кинология марказининг маъмурий биноси ва у ерда яратилган шарт шароитлар, хизмат итларининг ихтисослашган йўналишлари ҳамда уларга тиббий хизмат кўрсатиш фаолияти билан танишдилар.

Мутахассислар томонидан ёш хизмат итларининг машғулотлар давомида эришган натижалари намойиш этилди.

Хизмат итлари нафақат жамоат тартибни сақлаш, балки гиёҳванд моддалар, портловчи моддалар, қурол-яроғ, инсон изларини топиш, қидирув ишларида иштирок этиш ва ҳатто инсон ҳаётига хавф солувчи вазиятларда фавқулодда чора кўришдек мураккаб вазифаларни бажармоқда. Шу боис, уларни тайёрлаш жараёни ҳам профессионал даражада, махсус режа асосида амалга оширилаётир.

Шунингдек, машғулот майдонида 10 та йўналишдаги лойиҳалар бўйича тақдимот қилинди. Улар орасида тажриба тариқасида илк бора қўлланилаётган ижтимоий лойиҳалар ҳам бор. Унга кўра келгусида кинология марказида тарбияланган хизмат итлари ногирон ва имконияти чекланган фуқароларга хизмат кўрсатади ва маълум бир йўналишда уларни уйдан дўкон ёки дорихонага бориб келишларида кўмаклашишга ўргатилади.

Масъулларга бу лойиҳаларни янада ривожлантириш, чет эл тажрибасини пухта ўрганиб, амалиётга янада мукаммал тарзда жорий этиш бўйича қўшимча топшириқлар берилди.

Таъкидлаш жоизки, Тошкент шаҳар ИИББ Кинология хизмати ходимлари мамлакатимиз миқёсида ўз йўналишда ўтказилаётган турли мусобақа ва танловларда юқори натижаларни қайд этиб келишмоқда. Марказнинг уч нафар ходимлари ҳуқуқни муҳофаза қилувчи идоралар ўртасида бўлиб ўтган ”Содиқ дўс -2025” хизмат итларининг кўргазмали кўрик танловида жамоалар ичида 1-ўринни эгаллашган.

Тадбир жараёнида Ватанимиз тинчлиги ва эл-юрт осойишталигини таъминлаш йўлидаги фидокорона хизматлари учун Тошкент шаҳар ИИББ Жамоат тартибини сақлаш бошқармаси Кинология фаолиятини ташкил этиш бўлими бошлиғи подполковник Холмурод Холиқулов, Тезкор қидирув хизмати бўлим бошлиғи подполковник Юлдошбек Никадамбаев, Кинология бўлими кичик инструктор-кинологи сафдор Қурбонали Тўхтасинов, Кинология бўлими кичик инструктор-кинологи сафдор Дилшод Юсупов III даражали “Ички ишлар органларида бенуқсон хизматлари учун” кўкрак нишони билан, Тошкент шаҳар ИИББ Молия ва моддий техника таъминоти бошқармаси бошлиғи полковник Хусниддин Шамсутдинов ҳамда Молия ва моддий-техника таъминоти бошқармаси бошлиғи ўринбосари майор Руфат Дилмуродов Ички ишлар вазирлигининг “Эсдалик қўл соати” билан тақдирландилар, шунингдек Кинология бўлими 2-сон кинология бўлинмаси бошлиғи капитан Ойбек Бойматов ва Кинология бўлими кичик инспектор-кинологи сафдор Мехриддин Исоқжонов пул мукофоти билан рағбатлантирилдилар.

Янги фойдаланишга топширилган марказ нафақат Ички ишлар вазирлиги балки юртимиздаги барча ҳуқуқни муҳофаза қилувчи органлар билан ҳамкорликда фаолият олиб боради ҳамда жиноятчиликка қарши курашишда ходимларнинг энг яқин кўмакчиси бўлган хизмат итларини парваришлашда ўзига хос мактаб сифатида шаклланиши мақсад қилинган.