Ўзбекистон Республикаси Президенти ҳузуридаги Давлат бошқарув академиясида ҳудудий ички ишлар органлари раҳбар ходимлари ҳамда ИИВ Академияси магистратура тингловчилари учун навбатдаги ўқув-амалий семинари бошланди
2025-04-07 15:30:00 / Янгиликлар
Ички ишлар органлари тизимида хизмат қилаётган кадрлар салоҳиятини ошириш ҳамда уларнинг олдига қўйилган муҳим вазифалар, соҳага оид қонунчиликдаги ўзгаришларни етказиш мақсадида мунтазам равишда учрашувлар, семинарлар ва бошқа кўплаб амалий машғулотлар ўтказиш йўлга қўйилган.
Ўзбекистон Республикаси Президенти ҳузуридаги Давлат бошқаруви академиясида бошланган навбатдаги ўқув-амалий семинари ҳам жиноятчиликка қарши курашиш, маҳалла жиноятчилигини барвақт олдини олиш ҳамда энергетик хавфсизликни таъминлаш фаолиятини ташкил этишга оид билимларни ривожлантириш мақсадида бўлиб ўтмоқда. Семинарда республиканинг туман-шаҳар ИИБ бошлиқлари, Ташкилий бошқарма бошлиғининг ўринбосарлари ҳамда ИИВ Академияси магистратура тингловчилари иштирок этмоқда.
Бугун 7 апрел куни бошланган семинарни Ўзбекистон Республикаси Президенти маслаҳатчиси Дониёр Қодиров очиб берди. Мамлакатимизнинг барча ҳудудларидан келган, ички ишлар органларининг асосий бўғинида раҳбарлик вазифаларида хизмат қилаётган ходимларга семинардан кўзланган асосий мақсад етказилди.
Ички ишлар вазири Азиз Тошпўлатов ҳам замонавий билимларни ўзлаштириш, дунёда рўй бераётган ҳодисалардан ўринли хулоса чиқарган ҳолда, хизмат ҳудудида жиноятчиликка қарши курашишда тизимли ишларни йўлга қўйиш бугунги тингловчилар олдидаги асосий вазифа эканлигини таъкидлаб ўтди.
Давлат бошқаруви академияси ректори Адхам Бекмуродов модераторлик қилаётган ўқув-амалий семинари давомида юртимиздаги барча ҳуқуқни муҳофаза қилиш идоралари раҳбарлари, Олий ўқув юртлари ҳамда Академиянинг катта тажрибага эга профессорлари томонидан маърузалар ўтилиши режалаштирилган.