Сўнги йилларда мамлакатимизда соғлиқни сақлаш тизими тубдан ислоҳ қилиниб, соҳанинг моддий-техник базаси мустаҳкамланди, тизимга илғор даволаш ва диагностика усуллари, инновацион технологиялар кенг татбиқ этилиб улкан ютуқларга эришилмоқда.

Мазкур ислоҳотлар ички ишлар органлари тиббиёт тизимида ҳам ўз аксини топмоқда. Ички ишлар органлари тиббиёт ходимларининг самарали фаолияти натижасида соҳа ходимлари ватан осойишталиги йўлида соғ-саломат хизмат қилаётганини эътироф этмасликнинг иложи йўқ.

Бугун ана шундай ўз касбига фидоий бўлган тиббиёт ходимларининг касб байрами арафасида ҳамда Ички ишлар вазирлиги Марказий госпитали ташкил этилганлигининг 70 йиллиги муносабати билан Ички ишлар вазирлиги Марказий госпиталида Эсдалик монументининг тантанали очилиш маросими бўлиб ўтди. Тадбирда Ички ишлар вазирининг ўринбосари генерал-майор Даврон Назармухамедов иштирок этиб, соҳада эришилган ютуқлар ҳақида тўхталди, тиббиёт ходимларининг келгуси эзгу фаолиятларида улкан зафарлар тилади.

Шундан сўнг, Ички ишлар вазирлиги Марказий госпитали ташкил этилганлигининг 70 йиллиги ҳамда тиббиёт ходимлари куни муносабати билан вазирлик “Жар” мажмуасида тантанали байрам тадбири ташкил этилди. Унга Ички ишлар вазирлиги раҳбарияти, соҳавий хизмат масъуллари, фахрийлар шунингдек соғлиқни сақлаш ҳамда ҳуқуқни муҳофаза қилиш органлари вакиллари ташриф буюрдилар.

Байрам тадбирини ички ишлар вазири генерал-лейтенант Пўлат Бобожонов очиб бериб, бугунги кунда юртбошимиз томонидан тиббиёт соҳасига берилаётган катта эътибор ва яратилаётган шароитлар ҳақида сўз юритди.

Тадбир жараёнида бир гуруҳ тиббиёт ходимларига давлат мукофотлари ҳамда вазирликнинг идоравий кўкрак нишонлари, қимматбаҳо эсдалик совғалар ва пул мукофотлари тақдим этилди.

Тадбир давомида ташриф буюрган юқори мартабали меҳмонлар, давлат органлари ва ташкилот мутасаддилар, соҳа вакилларига байрам табрикларини етказдилар.

Байрам тадбири вазирлик ансамбли хонандалари томонидан тайёрланган консерт дастурида, Ватанни мадҳ этувчи ва тиббиёт ходимларининг машаққатли меҳнатларига бағишланган куй ва қўшиқлар барчага байрамона кайфият бағишлади.