Ўзбекистон Республикаси Ички ишлар вазирлиги

Ҳурматли ички ишлар органлари ходимлари!

Азиз фахрийлар!

Сизларни ва оила аъзоларингизни барчамиз учун қадрли бўлган касб байрами 25 октябрь – Ички ишлар органлари ходимлари куни муносабати билан самимий табриклайман!

Юртимиз тинчлик-осойишталигини сақлаш, жамоат тартиби ва фуқаролар хавфсизлигини таъминлашдек олижаноб вазифага ўз ҳаётини бағишлаб келаётган – қадрли ходимлар, ҳарбий хизматчилар, таълим муассасалари профессор-ўқитувчилари, тингловчи-курсантлари, муҳтарам фахрийларимиз ҳамда хизмат бурчини бажариш чоғида ҳалок бўлган ҳамкасбларимизнинг оила аъзоларига чуқур миннатдорлик изҳор этаман.

Мустақиллик йилларида барча жабҳаларда бўлгани каби ички ишлар органлари ҳам ғоят шарафли ва масъулиятли йўлни босиб ўтди. Айниқса, кейинги саккиз йилда Президентимиз Шавкат Миромонович Мирзиёев раҳбарлигида тизимда пухта ўйланган ва кенг қамровли ислоҳотлар амалга оширилди.

Бунинг натижасида Янги Ўзбекистонда “Барча ислоҳот ва ўзгаришлар – инсон қадрини юксалтириш учун” деган эзгу тамойилга таянган, юртимиздаги тинчлик-осойишталикнинг кафолати бўла оладиган, содиқ, юксак билим ва профессионал кўникмаларга эга ватанпарвар кадрларни ўзида жамлаган янги тизим яратилди.

Давлатимиз раҳбари “Агар давлат таянадиган асосий устун қонун бўлса, унинг кучини амалда намоён этадиган энг самарали тизим, бу – ички ишлар соҳаси, десак айни ҳақиқат бўлади”, деб таъкидлагани зиммамиздаги масъулиятни янада ошириш билан бирга, барчамизга билдирилган юксак ишонч ҳамдир.

Фурсатдан фойдаланиб, Сизларни бугунги қутлуғ байрам билан яна бир бор чин дилдан табриклаб, мамлакатимиз хавфсизлиги ва ҳудудий яхлитлигини таъминлаш, жамиятимизда тинчлик ва осойишталикни мустаҳкамлаш каби шарафли фаолиятингиз йўлида – барчангизга мустаҳкам соғлиқ, оилавий бахт, янги муваффақиятлар тилайман.

Ўзбекистон Республикаси ички ишлар вазири,
генерал-лейтенант П.Р.Бобожонов