Сурхондарёда спортнинг стол тенниси тури бўйича “Ички ишлар вазири кубоги” мусобақасига старт берилди
2026-02-16 15:05:00 / Янгиликлар
Жорий йилнинг 15 февраль куни Сурхондарё вилояти Ички ишлар бошқармасида спортнинг стол тенниси тури бўйича “Ички ишлар вазири кубоги” мусобақасига тантанали равишда старт берилди.
Мусобақани ўтказишдан кўзланган асосий мақсад — ички ишлар органларида жисмоний тарбия ва спортни янада оммалаштириш, ходимлар ўртасида соғлом турмуш тарзини кенг тарғиб қилиш ҳамда жисмоний фаолликни тизимли ва самарали ташкил этишдан иборат.
Мусобақада вазирликнинг таркибий тузилмалари ва ҳудудий бўлинмалари терма жамоалари ўзаро куч синашмоқда. Спортчилар дастлаб қура ташлаш орқали ўз рақибларини аниқлаб олдилар ва қизғин беллашувларга киришдилар.
Мазкур мусобақада; 21 та жамоа, жами 65 нафар ходимлар иштирок этмоқда. Ҳар бир жамоа ғалаба учун астойдил ҳаракат қилиб, юқори спорт маҳоратини намоён этмоқда.
Бугунги кунда мамлакатимизда оммавий спортни ривожлантириш, аҳоли ўртасида жисмоний фаолликни ошириш ва соғлом турмуш тарзини шакллантириш давлат сиёсати даражасига кўтарилган. Шу жиҳатдан, “Ички ишлар вазири кубоги” мусобақаси нафақат спорт беллашуви, балки ходимларнинг жисмоний ва маънавий тайёргарлигини мустаҳкамлашга хизмат қилаётган муҳим тадбир ҳисобланади.
Мусобақа давомида кучли ва маҳоратли жамоалар сараланиб, ғолиблар муносиб тақдирланиши кутилмоқда.