Белгиланган вазифаларнинг амалда бажарилиши, шунингдек ҳуқуқ-тартибот идораларининг хизмат фаолияти пойтахтнинг Чилонзор ва Учтепа туманларида ўрганилди.

Хусусан, Чилонзор тумани «Новза» маҳалласи ҳудудида жойлашган «Корзинка» савдо мажмуасида аҳоли учун яратилган шарт-шароитлар ҳамда хавфсизлик чораларига эътибор қаратилди.

Савдо мажмуасида хавфсизликни таъминлашга жалб қилинган ходимларнинг ахборотлари тингланиб, ҳуқуқни муҳофаза қилувчи органлари билан ҳамкорликда хизматни ташкиллаштириш борасида тегишли кўрсатмалар берилди.

Шунингдек, бино ичида ўрнатилган ташвиш-чақирув тугмаси ишга туширилиб, савдо мажмуасида содир этилиши мумкин бўлган кўнгилсиз ҳолатларда бириктирилган ходимларнинг шайлик ҳолати назорат тариқасида текширилди.

Тадбир давомида ишчи гуруҳ томонидан Чилонзор туманида дислокация қилинган Тошкент шаҳар ИИББ Жамоат тартибини сақлаш бошқармаси Пост патруль хизмати бригадаси фаолияти ўрганилди.

Жараёнда, хизматга жалб этилган шахсий таркиб ва бириктирилган куч ва воситаларнинг шайлиги, шунингдек уларнинг тезкор вазиятни барқарорлигини таъминлашга тайёргарлиги текширилиб, хизмат фаолиятини такомиллаштириш юзасидан аниқ вазифалар берилди.

Ишчи гуруҳ томонидан Чилонзор тумани «Навбаҳор» маҳалласида жойлашган 3-сон Ички ишлар бўлими фаолияти ҳамда ходимларнинг тунги хизмат жараёнлари текширилди.

Шахсий таркиб олдига, криминоген вазияти оғир ҳисобланган «қизил» тоифадаги маҳаллаларда жиноятчиликни жиловлаш, ёшлар ва аёллар томонидан содир этилаётган ҳуқуқбузарликларни кескин қисқартириш, ҳисобда турган шахслар билан «индивидуал профилактик» ишларини олиб бориш, ижтимоийлашув ва пробация ишларини самарали ва манзилли амалга оширишни такомиллаштириш бўйича кўрсатмалар берилди.

Текширув давомида ишчи гуруҳ аъзолари Учтепа тумани Ички ишлар органлари фаолиятини мувофиқлаштириш бошқармасининг хизмат жараёни ҳамда ходимларга яратилган шароитлари билан ҳам танишдилар.

Асосий эътибор, ҳамкор ташкилотлар билан биргаликда намунавий хизмат ўташ моделларини амалга киритилиши, маҳалларда шахсий хонадонлар ва жамоат жойларида видеокузатув қамрови оширилиши, шаҳар йўлларида хавфсиз ҳаракатланиш, пиёдалар, айниқса болалар, ёшлар ва аёллар хавфсизлигини таъминлаш бўйича кўрилаётган чора-тадбирларга қаратилди.

Ўрганиш жараёнида, аниқланган барча камчиликлар танқидий муҳокама қилиниб, келгусида хизмат фаолиятини такомиллаштиришга оид мақсадли чора-тадбирлар белгилаб олинди.