Qashqadaryo viloyati hоkimligi

Shahrisabz shahrida Qashqadaryo viloyati hokimi Murotjon Azimov vohamizda bo‘lib turgan BMTning O‘zbekistondagi doimiy koordinatori Sabina Mahl xonim boshchiligidagi delegatsiyani qabul qildi. 

Delegatsiya tarkibida BMT Taraqqiyot Dasturi vakolatxonasi rahbari Akiko Fujio xonim, BMT Aholishunoslik jamg‘armasi doimiy vakili Nigina Abaszade xonim va BMT uyushgan jinoyatchilik va giyohvandlikga qarshi kurashish boshqarmasi Oliver Shtolpelar ham bor.

Ma’lumot uchun, tarixiy shahar – Shahrisabzda shu kunlarda BMT tashkilotlarining hisobot yig‘ilishi o‘tkazildi. Mehmonlar, vohamiz mahallalarida, ta’lim muassasalarida va turizm manzillarida ham bo‘lishdi. Shuningdek, tashkilot bilan hamkorlik natijasida bir qator ishlar ham amalga oshirilmoqda. 

Xususan, BMT taraqqiyot dasturi va UNICEF ko‘magida Shahrisabz shahridagi Zingiron mahallasida “Yoshlar Markazi” o‘z faoliyatini boshladi.

BMT Taraqqiyot dasturi yordamida Chiroqchi tumanidagi 4 ta mahalla hududida umumiy maydoni 103 gektar bo‘lgan yashil mikrorayon bosh rejasi ishlab chiqildi.

BMTning Aholishunoslik jamg‘armasi viloyatdagi demografik tendensiyalar, jumladan, aholi sonining o‘sishi prognozi, yosh tarkibidagi o‘zgarishlar, qarish darajasining tahliliy sharhini tayyorlab berdi.

Jahon sog‘liqni saqlash tashkiloti yurak-qon tomir, diabet, surunkali respirator, saraton kabi kasalliklarni oldini olish bo‘yicha viloyatimizdagi shifokorlar, patronaj hamshiralar uchun treninglar tashkil qildi. 

Navbatdagi ikki tomonlama muloqot davomida ham bir qator masalalarda muhokamalar o‘rtaga tashlanib, kelajakda o‘z samarasini beradigan loyihalarni birgalikda amalga oshirishga kelishib olindi.