Qashqadaryo viloyatida Kasaba uyushmalari kuni keng nishonlandi
2024-11-11 10:05:00 / Yangiliklar
O‘zbekiston kasaba uyushmalari federatsiyasi Qashqadaryo viloyati kengashi tomonidan 11-noyabr — Kasaba uyushmalari kuni munosabati bilan tantanali bayram tadbiri tashkil etildi. Unda viloyat hokimi Murotjon Azimov so‘zga chiqib, barchani kasaba uyushmalari kuni bilan samimiy qutladi.
Murotjon Azimov: Xolisona aytganda, so‘nggi yillarda kasaba uyushmalari jamiyatimizning muhim bir bo‘lagiga aylandi.
Kasaba uyushmalari faoliyatini barchamiz o‘z hayotimizda his etib, ko‘rib, anglab turibmiz. Ishchi-xodimlarning huquq va manfaatlarini himoya qilish, ularga munosib mehnat muhitini yaratib berilishida ushbu kengashning hissasi beqiyos. Qanchadan qancha xodimlarga sihatgohlarga davolanishi uchun yo‘llanmalar berilmoqda, salomatligi tiklanmoqda, moddiy va ma’naviy rag‘batlantirib kelinmoqda.
Qolaversa, Prezidentimiz qarori asosida tashkil etilgan va Markaziy Osiyoda yagona bo‘lgan Kasaba uyushmalari akademiyasi mehnat va ijtimoiy munosabatlar sohasiga oliy ma’lumotli yetuk kadrlarni tayyorlab kelmoqda. “Kasaba uyushmalari to‘g‘risida”gi yangi qonun bilan tizimga ko‘plab vakolatlar berildi.
Ta’kidlash joiz, bugungi kunda viloyatimizda kasaba uyushmalari tizimida 2850 ga yaqin boshlang‘ich tashkilotlar samarali faoliyat ko‘rsatmoqda. Ularda 200 dan ziyod xodim va 10 mingga yaqin faollar mehnat qilib kelishmoqda.
Tadbir davomida taniqli san’atkorlar tomonidan sahnalashtirilgan konsert dasturi yig‘ilganlarga manzur bo‘ldi. Ko‘p yillar fidoyi mehnatlari bilan obro‘ qozongan bir guruh viloyatimizdagi turli soha vakillari tashakkurnoma va estalik sovg‘alari bilan taqdirlandi.
Fotolavhalar: https://t.me/qvh_axboroti/29298