Yoshlar bilan ishlash borasida 2024-yilda amalga oshirilgan ishlar va Yoshlar forumi 2024 yakunlari bo'yicha brifing o‘tkazildi
2024-12-26 13:00:00 / Matbuot anjumanlari
“Yoshlar va biznesni qo‘llab-quvvatlash yili”da yoshlar masalasiga oid 3 ta qonun, 21 ta Prezident Farmoni va qarori, 15 ta Vazirlar Mahkamasi qarori qabul qilinib, yoshlar uchun 100 dan ortiq yangi imkoniyat va imtiyozlar yaratildi.
Joriy yil boshida 9 452 ta mahallada o‘tkazilgan xatlov orqali 8,3 mln yoshning “yoshlar balansi” shakllantirilib, ularning individual muammosi, qiziqishi va iqtidoridan kelib chiqib, qator tizimli ishlar amalga oshirildi.
Respublika komissiyasi va Davlat xavfsizlik xizmati nazorati ostida 377 ming yoshning “fuqarobay” ishlab chiqilgan “Yoshlar bandligi dasturi” ijrosini ta’minlash yuzasidan Shtablar tashkil etilib, quyidagi ishlar amalga oshirildi:
152 ming 742 nafar yoshga dehqonchilik qilishi uchun “mahalla yettiligi” tavsiyasi bilan 56 ming gektar unumdor yer maydonlari ajratilib, 2 ta mavsumda 165,4 ming tonna mahsulot yetishtirildi;
respublika hududlarining 1 tadan tumanida (jami 14 ta) “Uychi tumani tajribasi” joriy etilib, ishsiz va norasmiy faoliyatdagi 62,9 ming yoshning bandligi ta’minlandi;
Tarbiyasi og‘ir hamda ijtimoiy himoyaga muhtoj yoshlar muammosini hal qilish va hayotda o‘z o‘rnini topishga qaratilgan zarurchora-tadbirlar amalga oshirildi.
Xususan:
davlat idoralarining 7 965 nafar respublika-viloyat-tuman rahbarlariga tarbiyasi og‘ir bo‘lgan 123 ming yosh nomma-nom biriktirilib, ularning barchasi bilan uchrashuvlar o‘tkazildi va muammosi aniqlangan 76,5 ming yoshga ko‘mak ko‘rsatildi;
Huquqni muhofaza qiluvchi organlarning xodimiga otaliqqa berilgan 4 mln nafar yosh bilan o‘tkazilgan uchrashuvlar natijasida ularning dunyoqarashini o‘zgartirish orqali hayotda o‘z o‘rnini topishga ko‘maklashilib, murojaat qilgan 369 373 nafarining muammolari hal etildi;
“Yoshlar daftari”ga 197,2 ming yosh kiritilib, “mahalla yettiligi” tavsiyasi bilan 176,5 ming nafariga 251,7 mlrd so‘mlik ko‘mak ko‘rsatildi;
Natijada 3 643 ta mahalla “yoshlar jinoyatchiligidan holi hudud”ga aylandi.
“Yoshlar va biznesni qo‘llab-quvvatlash yili”da amalga oshirilgan ishlarni sarhisob qilish hamda 2025 yildagi dolzarb vazifalar muhokamasini o‘tkazish maqsadida dekabr oyi davomida “Yoshlar forumi-2024” loyihalari o‘tkazildi.
Jumladan:
ilk bor yoshlarni xorijiy til va zamonaviy kasblarga o‘qitishni yanada ommalashtirishga qaratilgan “O‘quv markazlari forumi” tashkil etilib, forumda yuqori reytinga ega 3 ming yaqin o‘quv markazlari ishtiroki ta’minlandi.
shuningdek, mahallardagi yoshlar yetakchilarining Respublika forumi hamda Eng namunali yoshlar yetakchisi respublika ko‘rik tanlovining final bosqichi tashkil etilib, hududlardan kelgan 280 nafar yoshlar yetakchilaridan 30 nafari taqdirlandi;
hududlarda oliy ta’lim muassasalari yoshlar yetakchilari hamda birinchi prorektorlarining forumlari, shuningdek, Toshkent shahridagi Zakovat arenada talabalar o‘rtasida “Intellektual olimpiada” tashkil etilib, 50 ming nafar yosh qamrab olindi;
Vazirliklar, idora va tashkilotlar rahbarlari tomonidan 1 300 dan ortiq yosh mutaxassislar va yoshlar ishtirokida muloqot va uchrashuvlar o‘tkazildi;
shuningdek, yoshlarning iqtidorini rivvojlantirish hamda ularni zamonaviy kasb, xorijiy til va kitobxonlikka qiziqishini oshirishga qaratilgan “Ustoz AI”, “UzChess”, “Ibrat farzandlari”, “TOP 100 Uni”, “Mutolaa” “Qizlar akademiyasi” loyihalari hamda “Ildiz” va “Yoshlar uchun 1000 kitob” to‘plamlari, “Kurash” filmi taqdimoti o‘tkazilib, 10 mingga yaqin yoshlar qamrab olindi;
500 ga yaqin yosh ishtirokida Namangan shahrida “Yosh dehqonlar” forumi hamda ular tomonidan yetishtirilgan mahsulotlar yarmarkasi bo‘lib o‘tdi.
Samarqand shahrida Respublika bo‘yicha 200 mingdan ortiq yosh ishtirokida o‘tkazilgan “Kasblar tanlovi” loyihasining yakuniy bosqichi tashkil etilib, novvoylik, dizayn, elektromontaj, payvandchilik va qurilish ustachiligi yo‘nalishlarda eng munosiblar aniqlandi.
“Toshkent – MDH yoshlar poytaxti” loyihasining tantanali yopilish marosimi hamda Xalqaro volontyorlar forumi doirasida tashkil etilgan tadbirda MDH davlatlari yetakchi volontyorlari, xalqaro tashkilotlar vakillari va O‘zbekiston volontyorlik maktablarining faol a’zolaridan iborat 650 nafar yosh ishtirok etdi.
Forum yakunida “Toshkent — MDH yoshlar poytaxti” xalqaro loyihasining yopilish marosimi o‘tkazildi va 2025-yil uchun bu estafeta Ozarbayjonning Gabala shahriga topshirildi.
Shuningdek, tadbirlar doirasida mamlakatimiz taraqqiyotiga munosib hissa qo‘shib kelayotgan 110 nafar mas’ul va yoshlarga “O‘zbekiston belgisi” ko‘krak nishoni topshirildi.
2025 yil – “Atrof-muhitni asrash va “yashil” iqtisod yili”da yoshlar siyosati sohasida amaga oshiririlishi muhim bo‘lgan taklif-tashabbuslarni umamlashtirish uchun www.yoshlarforumi.uz veb-platformasi ishga tushirilib, 17 ta yo‘nalishda 3 500 dan ortiq taklif qabul qilindi.
Dekabr oyi davomida o‘tkazilgan forum doirasidagi tadbir va loyihalar orqali 1,5 mln nafar yoshlar qamrab olindi.
Brifingni Yoshlar ishlari agentligi Youtube kanalida tomosha qilishingiz mumkin