Frankfurt xalqaro kitob ko‘rgazmasi: o‘zbek kitobxonlari uchun yangi imkoniyatlar
2026-10-12 10:10:00 / Yangiliklar
Yoshlar ishlari agentligi delegatsiyasi Germaniyada o‘tkazilgan 78-Frankfurt xalqaro kitob ko‘rgazmasida ishtirok etib qaytdi.
Besh kun davom etgan ko‘rgazma dunyoning yetakchi nashriyotlari bilan to‘g‘ridan to‘g‘ri muloqot qilish, zamonaviy ilm-fan va ta’limga oid adabiyotlarni o‘zbek tiliga tarjima qilish bo‘yicha hamkorlik imkoniyatlarini kengaytirishga xizmat qildi.
Xususan, MIT Press, Oxford University Press, Princeton University Press, Phaidon, Znak nashriyotlari hamda Eastern European and Asian Rights Agency (EEARA) vakillari bilan muzokaralar olib borildi. Asosiy e’tibor sun’iy intellekt, texnologiya, ilm-fan va ta’lim yo‘nalishlaridagi fundamental asarlarning mualliflik huquqlarini olish, ularni tarjima qilish va o‘zbek kitobxonlariga yetkazish masalalariga qaratildi.
Ko‘rgazma yakunida tashkilotchilar va Markaziy Osiyo delegatsiyalari vakillari ishtirokida uchrashuv bo‘lib o‘tdi. Unda Frankfurt xalqaro kitob ko‘rgazmasining ko‘p yillik rahbari Juergen Boos, yangi rahbari Joachim Kaufmann, asosiy hamkorlar bilan ishlash bo‘yicha mas’ul Vladka Kupska hamda xalqaro loyihalar bo‘yicha menejer Bettina Back qatnashdi.
Muloqot davomida mintaqada kitobxonlikni rivojlantirish tajribasi, O‘zbekistonda davlatimiz rahbari tomonidan ushbu sohaga qaratilayotgan e’tibor, Yoshlar ishlari agentligi tizimidagi loyihalar, jumladan, “Yoshlar uchun ming kitob” tashabbusi hamda kelgusidagi hamkorlik istiqbollari muhokama qilindi.