O‘zbеkistоn Rеspublikаsi Yoshlar ishlari agentligi

"RCOY Central Asia 2026" doirasida yoshlar va BMT Bosh kotibi yordamchisi, BMT Yoshlar masalalari bo‘yicha ofisi rahbari Felipe Paullier hamda Yoshlar ishlari agentligi direktori Alisher Sa’dullayev ishtirokida ochiq muloqot sessiyasi o‘tkazildi.

Sessiya an’anaviy qoliplardan chekingan holda tashkil etildi. Asosiy maqsad — yoshlarga o‘zlarini qiziqtirgan savollarni bevosita qaror qabul qiluvchilarga berish imkoniyatini yaratish edi.

Muloqot davomida Markaziy Osiyoda yoshlar siyosatiga mas’ul davlat tashkilotlari o‘rtasidagi hamkorlikni yanada kuchaytirish va buning uchun mintaqaviy mexanizm yaratish taklifi muhokama qilindi. Shuningdek, nogironligi bo‘lgan yoshlar uchun BMT tizimida mavjud imkoniyatlar va ularning xalqaro jarayonlardagi ishtirokini kengaytirish masalalari ko‘tarildi.

Suhbat davomida sun’iy intellekt va innovatsiyalarning yoshlar kelajagidagi o‘rni, yangi texnologiyalar yaratayotgan imkoniyatlar hamda yosh avlodning o‘zgarayotgan mehnat va ijtimoiy muhitga tayyorligi masalalariga ham alohida e'tibor qaratildi.

Ushbu uchrashuv yoshlarning siyosiy jarayonlardagi ishtiroki faqat ular haqida gapirish bilan emas, balki ular bilan to‘g‘ridan-to‘g‘ri muloqot qilish, savollarini tinglash va takliflarini muhokama qilishdan boshlanishini amalda ko‘rsatib berdi.