O‘zbеkistоn Rеspublikаsi Yoshlar ishlari agentligi

“Besh tashabbus olimpiadasi” doirasida “Yosh kitobxon oila” tanlovi yosh oilalar o‘rtasida kitobxonlik madaniyatini yuksaltirish, har bir oila a’zosini kitob mutolaasiga keng jalb etish, ular o‘rtasida o‘zaro mehr-oqibat, odob-axloq fazilatlarini rivojlantirish maqsadida tashkil etilmoqda.

“Yosh kitobxon oila” tanlovining yangi mavsumida 96 mingga yaqin yosh oilalar ishtirok etish uchun onlayn ro‘yxatdan o‘tdi (Ma’lumot uchun 2024 yilda 94 ming oila).

O‘zbekiston Respublikasida istiqomat qilayotgan millati, dini, ijtimoiy kelib chiqishi va tilidan qat’iy nazar 30 yoshgacha bo‘lgan barcha yosh oilalar Tanlovda ishtirok etish huquqiga ega.

Tanlovda 1995-2005 yillar oralig‘ida tug‘ilgan yosh oilalar
(er va xotin) ishtirok etish huquqiga ega.

Tanlov 3 bosqichda tashkil etiladi.

Birinchi bosqich tanlovning tuman (shahar) bosqichi bo‘lib, yosh oilalardan arizalar qabul qilinadi (https://t.me/kitobxonoila_bot orqali ro‘yxatdan o‘tiladi) va ishtirokchilar test sinovi (25 ta test savollariga javob beriladi) asosida saralanadi. Test natijalariga ko‘ra tuman (shahar) kesimida eng ko‘p ball to‘plagan 1 oila (1 tadan ko‘p oila o‘rtasida qayta test olish orqali saralanadi) keyingi (ikkinchi) bosqichda ishtirok etish huquqini qo‘lga kiritadi.

Ikkinchi bosqich tanlovning hududiy (Qoraqalpog‘iston Respublikasi, viloyatlar va Toshkent shahar) bosqichi bo‘lib, quyidagi 2 ta shart asosida o‘tkaziladi:

“Badiiy asarlar bilimdoni” sharti. Ushbu shartda biror asardagi syujetga oid epizod yoki she’riy parcha o‘qib eshittiriladi. Ishtirokchidan ushbu asar nomini yoki she’riy parchada tushirib qoldirilgan so‘zni topishi hamda uning mazmun-mohiyati, g‘oyasi va ahamiyati to‘g‘risida sharhlab berishi so‘raladi.

“Tezkor savol-javob” sharti. Tavsiya etilgan adabiyotlardan tuzilgan 10 ta savolga 10 ta javob berish so‘raladi (oila a’zolaridan 5 ta savolga oila boshi, 5 ta savolga xotin javob berishi shart). G‘oliblikni qo‘lga kiritgan 1 ta oila vakillari respublika bosqichiga yo‘llanma oladi.

Uchinchi bosqich tanlovning Respublika bosqichi bo‘lib, teletanlov shaklida, quyidagi 3 ta shart asosida o‘tkaziladi:

1-shart. “Badiiy asarlar bilimdoni” sharti.

2-shart. “Insho yozish” sharti.

3-shart. “Tezkor savol-javob” sharti.

Tuman (shahar) bosqichi g‘oliblari 1-o‘rin – diplom, hududiy bosqichga yo‘llanma, 2- o‘rin – 15 ta kitob, diplom, 3-o‘rin – 10 ta kitob, diplom;

Hududiy bosqichi g‘oliblari 1-o‘rin – diplom, respublika bosqichiga yo‘llanma, 2-o‘rin – 1 dona televizor 43”, diplom, 3-o‘rin – 1 dona televizor 43”, diplom, qolgan barcha ishtirokchilar sovg‘a va sertifikat;

Respublika bosqichi g‘oliblari 1-o‘rin – Prezident sovg‘asi – “BYD” elektromobil mukofoti, kitoblar to‘plami, diplom, 2-o‘rin – 50 million so‘m pul mukofoti, kitoblar to‘plami, diplom, 3-o‘rin – 30 million so‘m pul mukofoti, kitoblar to‘plami, diplom, qolgan barcha ishtirokchilar 10 million so‘mdan pul mukofoti, kitoblar to‘plami, sertifikat bilan taqdirlanadi.

Ta’kidlash lozimki, tanlov jarayonlari to‘liq televizion formatda suratga olinadi hamda efirga uzatib boriladi.

“Yosh kitobxon oila” tanlovining respublika bosqichi ishtirokchilari bilan tanishing