Xalqaro imtihon harajatlari bo‘yicha kompensatsiya: yoshlarni qiziqtirgan savollarga javoblar
2026-01-15 12:00:00 / Yangiliklar
1-savol: Men ariza topshirgan edim, ammo arizam rad etildi. Buning sababi nimada?
Javob: Arizaning rad etilish sababi har bir arizaning izoh (kommentariya) qismida ko‘rsatilgan bo‘ladi.
2-savol: Ariza topshirganimga 5 kun bo‘ldi, ammo holati hanuz “Yangi” deb ko‘rsatilmoqda. Kimga murojaat qilishim kerak?
Javob: Amaldagi tartibga muvofiq, arizalar 15 ish kuni ichida ko‘rib chiqiladi. Agar qo‘shimcha o‘rganish talab etilsa, ko‘rib chiqish muddati 45 kungacha uzaytirilishi mumkin.
3-savol: Arizam bo‘yicha “Tasdiqnoma” oldim, holati “Tayyorlandi” deb turibdi. Biroq bugun bankka borsam, mablag‘ berilmadi. Kim biz yoshlarga yo‘l-yo‘riq beradi?
Javob: Amaldagi tartibga asosan, “Tasdiqnoma” berilgan sanadan boshlab 15 kun ichida mablag‘lar moliyalashtiriladi.
Masalan, agar arizachi 18-sentabr kuni tasdiqnoma olgan bo‘lsa, u 30-sentabrdan keyin hisob raqamda mablag‘ mavjud bo‘lgan taqdirda o‘z mablag‘ini “Xazna” mobil ilovasi orqali olishi mumkin.
Agar mablag‘lar hali mavjud bo‘lmasa, ilovada “Xizmat vaqtinchalik mavjud emas” degan xabarnoma chiqadi.
4-savol: “Xazna” mobil ilovasidan qanday ro‘yxatdan o‘tiladi? Ro‘yxatdan o‘ta olmayapman. Yordam bering.
Javob: “Xazna” mobil ilovasi bo‘yicha to‘liq ma’lumotni 1106 qisqa raqami orqali olishingiz mumkin.
5-savol: Arizam jarayonda bo‘lib, oxirgi bosqichda “Bank xulosasi” deb ko‘rsatilmoqda. Nega arizam ko‘rib chiqilmayapti?
Javob: Agar ariza holati “Bank xulosasi” bosqichida bo‘lsa, demak, ariza Agentlik tomonidan tasdiqlangan va mablag‘lar “Xazna” mobil ilovasi orqali qoplab beriladi.
6-savol: Mablag‘ni olish muddati 180 kun etib belgilangan deyilgan. Ushbu muddat qaysi vaqt oralig‘ini o‘z ichiga oladi?
Javob: Tasdiqnoma berilgan sanadan boshlab 180 kun davomida mablag‘ni istalgan vaqtda olish mumkin.
7-savol: Kompensatsiya mablag‘larini Xalq banki bermayapti, Yoshlar ittifoqi bermayapti, my.gov.uz bermayapti. Unda kim mas’ul?
Javob: Mazkur davlat xizmatini ko‘rsatish uchun Yoshlar ishlari agentligi mas’ul hisoblanadi.