Samarqandda YUNESKOning 14-Yoshlar forumi o‘tkazildi
2025-10-31 10:45:00 / Yangiliklar
Samarqandda dunyoning turli mamlakatlaridan yosh yetakchilar, ekspertlar, Milliy komissiyalar vakillarini jamlagan YUNESKO 14-Yoshlar forumining yakuniy tadbirlari bo‘lib o‘tdi. Ishtirokchilar YUNESKOning 43-Bosh konferensiyasida taqdim etiladigan tavsiyalar va harakat tamoyillarini ma’qulladilar. Project Café formatidagi yig‘ilishda iqlim va ijtimoiy muammolarni hal qilish, ta’limni rivojlantirish va barqaror kelajakni targ‘ib qilishga qaratilgan tashabbuslar ham muhokama qilindi.
Forum yakunida jamoaviy xulosalar taqdimoti va O‘zbekiston Milliy simfonik orkestri hamda taniqli DJ-lar DJ Sabine va DJ Gallivanter ishtirokidagi qizg‘in konsert dasturi bo‘lib o‘tdi. Ijodkorlik va xalqaro muloqot muhiti forumning madaniy almashinuv va yoshlar o‘rtasidagi o‘zaro hamkorlik platformasi sifatidagi ahamiyatini ta’kidladi.
Bunday yirik xalqaro tadbirning Samarqandda o‘tkazilishi shaharning jahon madaniy va tadbir turizmi markazi maqomini mustahkamlaydi. YUNESKO forumi O‘zbekistonda yoshlar, ilm-fan va san’atni birlashtirib, hamkorlik va ilhom uchun yangi imkoniyatlar ochilayotganining yana bir namunasidir.