O‘zbekiston Respublikasi Turizm qo‘mitasi

Mazkur ixtisoslashtirilgan xalqaro ko‘rgazma turli mamlakatlardan mehmonxona va restoran biznesi vakillari, jihozlar va texnologiyalar yetkazib beruvchilar, dizaynerlar, arxitektorlar, investorlar hamda mutaxassislarni birlashtiradi. Tadbir HoReCa sohasidagi asosiy yo‘nalishlarni, jumladan raqamlashtirish, barqaror rivojlanish, kelajak xizmatlari, restoran franshizalari va gastronomik turizmni muhokama qilish uchun markaziy maydon vazifasini o‘taydi.

Ochilish marosimidan so‘ng, rasmiylar va ko‘rgazma mehmonlari "HoReCa Expo Uzbekistan 2025" ko‘rgazma stendlari bilan tanishdilar.

Ko‘rgazma mehmonxona biznesi va restoran sanoatining so‘nggi yutuqlarini namoyish etuvchi 100 dan ortiq kompaniyalarni birlashtirdi. Ishtirokchilar HoReCa sohasida xizmat ko‘rsatish sifatini yaxshilashga yordam beradigan mahsulotlar va texnologiyalar, jumladan, uskunalar, IT-yechimlar va innovatsion gastronomik mahsulotlar bilan tanishish imkoniyatiga ega bo‘ldilar.

Ko‘rgazma doirasida “Xizmat va qulaylikka Investitsiyalar: HoReCa uchun biznes yechimlari” mavzusida xalqaro konferensiya ham bo‘lib o‘tmoqda, unda barqarorlik va texnologiyalarga e’tibor qaratgan holda mehmonxonalar arxitekturasi va dizaynining kelajagi, mehmonlar qulayligini oshirish uchun raqamli yechimlar, xizmat ko‘rsatish va qulaylikka sarmoya kiritish, shuningdek, texnologiyalarning HoReCa rivojiga ta’siri muhokama qilinmoqda. Franchayzing, yangi bozorlarga chiqish, mintaqaviy rivojlanish drayveri sifatida gastroturizm va restoran biznesining zamonaviy tendensiyalariga alohida e’tibor qaratilmoqda.

Ish beruvchilar va bo‘lajak mutaxassislar uchrashadigan maxsus hudud - Bo‘sh ish o‘rinlari yarmarkasiga alohida e’tibor qaratildi. Hilton, Hyatt, InterContinental, Accor, JW Marriott va mamlakatning yetakchi oliy o‘quv yurtlari yosh kadrlarga mehmondo‘stlik va restoran biznesi sohasida o‘z karyerasini boshlashni taklif qilmoqda.

Ko‘rgazmaning eng muhim tadbirlaridan biri 22-oktyabr kuni o‘tkaziladigan "Gastro Forum 2025" xalqaro gastronomiya forumi bo‘ladi. Forum restoratorlar, oshpazlar, oziq-ovqat ishlab chiqaruvchilari, gastronomiya ekspertlari va turizm sohasi vakillarini bir joyga to‘playdi. Unda gastronomiyaning hududlar va umuman mamlakatni targ‘ib qilishdagi muhim vosita sifatidagi roli muhokama qilinadi. O‘zbekistonda ilk bor ikki Michelin yulduziga sazovor bo‘lgan fransuz oshpazi o‘z falsafasi bilan o‘rtoqlashadi hamda oshxona va xizmat ko‘rsatishning jahon standartlariga erishish yo‘li qanday shakllanishi haqida so‘zlab beradi.

“HoReCa Expo Uzbekistan 2025” tajriba almashish, ishbilarmonlik aloqalarini o‘rnatish, yangi yechimlarni taqdim etish va muvaffaqiyatli amaliyotlarni o‘rganish uchun noyob imkoniyat yaratadi. Ishtirokchilar restoran va mehmonxona jihozlari, avtomatlashtirish texnologiyalari, dizayn sohasidagi eng so‘nggi ishlanmalar bilan tanishish imkoniyatiga ega bo‘ladilar. Shuningdek, gastronomik turizmni rivojlantirish istiqbollari va o‘zbek oshxonasining eksport salohiyatini muhokama qilish imkoniyati ham yaratiladi.

Tadbir O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazirligi huzuridagi Turizm qo‘mitasi va O‘zbekiston mehmonxonalar uyushmasi hamkorligida tashkil etilmoqda.