Toshkent va Rossiya shaharlarida "Palov festivali" boshlandi
2025-10-21 17:00:00 / Yangiliklar
Loyiha bir vaqtning o‘zida to‘rt shaharda - Toshkent, Sochi, Krasnaya Polyana va Voronejda o‘tkazilib, O‘zbekistonning oshpazlik merosi va uning YUNESKOning nomoddiy madaniy merosi ro‘yxatiga kiritilgan asosiy ramzi bo‘lmish palovga bag‘ishlangan.
Uch hafta mobaynida Lali restoranlarining mehmonlari O‘zbekistonning turli hududlari bo‘ylab gastronomik sayohat qilib, palov tayyorlashning rang-barang an’analarini o‘zlari uchun kashf etishlari mumkin. Brend-oshpaz Ruslan Italmazov va uning jamoasi yettita haqiqiy an’anaviy palov turini tayyorlashgan.
● Dumba yog‘ida qo‘y go‘shti va zirk qo‘shilgan choyxona oshi. Pishirilgan sarimsoq, marinadlangan tog‘ piyozi va xom uzumning achitilgan sharbati - gurob bilan tortiladi.
● Mol go‘shti, qizil guruch va kavartak bilan tayyorlangan farg‘onacha palov. Achchiq sho‘rva, turli xil suzma va yashil turp bilan dasturxonga tortiladi.
● Mol go‘shtli osh sofi. Unga qo‘shimcha tarzda qazi va o‘zbek pomidorlari beriladi.
● Mol go‘shti, no‘xat va mayiz qo‘shilgan kabuli oshi. "Shakarob" salati bilan birga tortiladi.
● Andijoncha qo‘y go‘shtli palov. Yonida yashil bochka pomidoridan tayyorlangan "Achiq-chuchuk" salati ham qo‘yiladi.
● Behi va mol go‘shtidan pishirilgan Samarqand uy oshi. Hamroh sifatida ayron va marinadlangan achchiq qalampir beriladi.
● Mol, qo‘y go‘shti va anor donalari qo‘shilgan "Uch quduq" palovi. Pomidor sharbatida uyda tayyorlangan tuzlama bodring bilan uyg‘unlashadi.
"Palov festivali" 2025-yil 9-noyabrgacha barcha "Lali" restoranlarida bir vaqtning o‘zida davom etadi.