Varshavadagi “TT Warsaw” xalqaro turizm yarmarkasida O‘zbekiston milliy stendi “Eng innovatsion stend” deb topildi
2025-10-13 15:40:00 / Yangiliklar
O‘zbekiston milliy stendi yarmarkaning eng diqqatga sazovor joylaridan biri bo‘ldi. Zamonaviy dizayn va interaktiv texnologiyalar imkoniyatlaridan foydalanilgan stend orqali mehmonlar mamlakatning boy madaniy merosi, gastronomiyasi, hunarmandchilik an’analari hamda yangi turistik yo‘nalishlari bilan yaqindan tanishish imkoniyatiga ega bo‘ldilar.
Tashkilotchilar tomonidan O‘zbekiston milliy stendi “Eng innovatsion stend” (“Most Innovative Stand”) nominatsiyasida g‘olib deb topildi. Bu esa mamlakatimizda turizm sohasini ilg‘or axborot texnologiyalari bilan uyg‘un rivojlantirishga qaratilayotgan e’tiborning amaliy natijasi sifatida e’tirof etildi.
Shuningdek, yarmarka doirasida Polsha va boshqa Yevropa davlatlarining turoperatorlari bilan uchrashuvlar o‘tkazilib, ikki tomonlama hamkorlikni rivojlantirish bo‘yicha qator muzokaralar o‘tkazildi.
O‘zbekistonning “TT Warsaw” yarmarkasidan olgan yuksak bahosi mamlakatimizning jahon turizm bozoridagi nufuzi ortib borayotganidan dalolat beradi.