OAV vakillari va taniqli blogerlar Sentob turizm qishlog‘iga tashrif buyurishdi
2025-09-28 11:50:00 / Yangiliklar
Tashrif davomida ishtirokchilar qishloqqa olib boruvchi ta’mirlangan ichki yo‘llar, tungi yoritish tizimi, piyodalar ko‘priklari, axborot markazi hamda yaratilgan turli qulayliklarni ko‘zdan kechirdilar. Shuningdek, ular mahalliy aholi tomonidan yo‘lga qo‘yilgan 20 ta oilaviy mehmon uyi va 3 ta xostel faoliyati bilan yaqindan tanishish imkoniyatiga ega bo‘ldilar.
Press-tur ishtirokchilariga Sentob qishlog‘ida rivojlanayotgan gastronomik va ekoturizm xizmatlari ham taqdim etildi. Milliy taomlar tayyorlash, uy muzeylari, non yopish bo‘yicha master-klasslar, esaklarda sayr va suvenirlar ishlab chiqarish kabi yo‘nalishlar jurnalistlarda katta qiziqish uyg‘otdi.
Tashrif yakunida Sentob mahallasida amalga oshirilgan ishlar mahalliy va xalqaro miqyosdagi ahamiyati bilan alohida ta’kidlandi. Shuningdek, 2022 yilda “Turizm qishlog‘i” maqomiga ega bo‘lgan va 2023 yilda UNWTO tomonidan “Eng yaxshi turizm qishlog‘i” sifatida e’tirof etilgan Sentobning sayyohlar uchun jozibadorligi yana bir bor namoyish etildi.