O‘zbekiston Respublikasi Turizm qo‘mitasi

Press-tur ishtirokchilari turizm maskanida mehmonlar uchun yaratilgan sharoitlar bilan yaqindan tanishdilar. Xususan, hududda 3 ta namatli va 16 ta toshdan qurilgan o‘tov mavjud. Mehmonlar uchun qadimiy uslubda bezatilgan hunarmandchilik ustaxonalari, milliy taomlar tayyorlanadigan oshxonalar va sahna maydonchalari ham barpo etilgan.

Tadbir davomida jurnalistlar va blogerlar uchun maxsus shou dasturlar ham tashkil qilindi. “Sehrgarlar shahri” deb atalgan bu maskanda an’anaviy raqslar, jonli musiqa, folklor chiqishlari va boshqa ko‘ngilochar sahnalar namoyish etildi. Bu orqali tashrif buyurganlar nafaqat hudud infratuzilmasi bilan, balki uning boy madaniy merosi bilan ham tanishish imkoniga ega bo‘lishdi.

Press-tur yakunida ishtirokchilar mazkur loyiha nafaqat mahalliy, balki xorijiy sayyohlar oqimini oshirishda muhim rol o‘ynashini qayd etdilar. “Sehrgarlar shahri” kabi turistik maskanlar orqali O‘zbekistonning sayyohlik salohiyati yangi bosqichga ko‘tarilishi mumkin. Shu bilan birga, bu kabi tashabbuslar milliy qadriyatlarimizni keng targ‘ib qilishda ham muhim vosita bo‘lib xizmat qiladi.