O‘zbekiston Respublikasi Turizm qo‘mitasi

Ekologiya, atrof-muhitni muhofaza qilish va iqlim o’zgarishi vazirligi, Turizm qo’mitasi va Qashqadaryo viloyati hokimligi hamkorligida tashkil etilgan qurultoyda respublikamizning 14 hududidan hamda Rossiya Federatsiyasi, Belarus, Qozog’iston, Qirg’iziston, Tojikiston va Turkmaniston Respublikalaridan kelgan 1000 nafardan ortiq yoshlar qatnashmoqda.

Tadbir doirasida dastlab matbuot anjumani bo’lib o’tdi. Unda bu galgi qurultoyning ahamiyati, avvalgi qurultoylardan farqli jihatlariga alohida to’xtalib o’tildi. Shuningdek,“Biz, bir jamoamiz – salom, qurultoy” shiori ostidagi tashrif namoyishida mahalliy va xorijlik yoshlardan iborat jamoalar o’z hududlarini ko’rgazmali chiqishlar orqali tanishtirishdi. Bunda milliy urf-odat va an’analar, ekologik vaziyat va atrof-muhitni muhofaza qilish bilan bog’liq muammolarga alohida e’tibor qaratildi. 

Shuningdek, qurultoy davomida har bir hudud o’z milliy stendlarini namoyish etdi. Ekologik va turizm salohiyat aks etgan, milliylikka qaratilgan stendlar hakamlar tomonidan baholandi.

Bundan tashqari, qurultoy tarixida ilk bor “TEDxQurultoy” loyihasi taqdim etildi. Unda har bir jamoadan yoshlar o’zlari guvoh bo’lgan turli muammoli masalalarga e’tibor qaratishdi. Shu bilan birga, ishtirokchilar Markaziy Osiyo yoshlarining turizm va ekologiya assotsiatsiyasi (“Central Asian tourism and ecology youth association”) nizom loyihasi bilan tanishishdi hamda assotsiatsiyaning mahalliy hamda xorijlik raislari saylandi.

Shu bilan birga, yoshlarning ekologik madaniyatini yanada oshirishga qaratilgan seminar ham tashkil etildi. Unda Ekologiya vaziri o’rinbosari Jusipbek Kazbekov, vazirlik departamenti rahbari Bahrom Xolxo’jayev va vazirlik Iqlim o’zgarishi milliy markazining Buyuk Britaniyalik menejeri Charlz Norman yoshlarga o’z tajribalaridan kelib chiqqan holda atrof-muhitni muhofaza qilish, tabiiy resurslarni asrash borasida muhim tavsiyalar berishdi.

Qurultoyning rasmiy ochilishiga bag’ishlangan tantanali marosimni Ekologiya vaziri o’rinbosari Jusipbek Kazbekov va Qashqadaryo viloyati hokimi Murodjon Azimov ochib berishdi. Jusipbek Kazbekov qurultoyning yoshlarni tabiatni asrash yo’lida birlashtirishdagi ahamiyati yuqori ekanligini ta’kidlagan bo’lsa, Murodjon Azimov ekofaol yoshlar safi yildan-yilga ortib borayotgani va bu nafaqat atrof-muhit, balki turizmni rivojlantirishga ham hissa qo’shayotganini qayd etdi.

Ochilish marosimida respublikamizning har bir hududidan saylangan “Yosh turizm elchilari” hamda “Yosh ekologlar harakati” kengashlari raislariga ishonch yorliqlari topshirildi.

Qurultoy 16-avgustgacha davom etadi. Ishtirokchilar turli seminarlar, intellektual o’yinlar, loyihalar taqdimotlari, musbaqalar va boshqa tadbirlar orqali o’z bilimlarini yanada mustahkamlashadi, g’oyalarini amalga tatbiq etishadi va o’zaro tajriba oshirishadi.

Bu kabi qurultoylar mahalliy va xorijlik yoshlarni ekologiya, atrof-muhitni muhofaza qilish va turizm sohasini rivojlantirish yo’lida birlashtirish, ularning faolligini oshirish, g’oya va tashabbuslarini ro’yobga chiqarish, o’zaro tajriba almashish va do’stona muhit yaratishga xizmat qiladi.