An’anaviy o‘zbek hovlisi ko‘rinishida qurilgan O‘zbekiston milliy paviloni Avaza mehmonlarida yorqin taassurot qoldirdi
2025-08-12 11:35:00 / Yangiliklar
“Markaziy Osiyo davlatlarining Milliy kunlari” mintaqa xalqlarining boy madaniy merosini, mustahkamlanayotgan qo‘shnichilik aloqalarini va kengayib borayotgan madaniy-gumanitar hamkorligini namoyish etish maqsadida uyushtirildi.
Ma’lumot o‘rnida: Birlashgan Millatlar Tashkilotining dengizga chiqish yo‘liga ega bo‘lmagan rivojlanayotgan mamlakatlar bo‘yicha uchinchi konferensiyasi doirasida xorijiy davlat rahbarlari va mehmonlar joriy yilning 5-avgust sanasida o‘z ishini boshlagan “O‘zbekiston Milliy pavilyoni” bilan tanishgan edilar.
Bu yerda anʼanalar va hunarmandchilikka bag‘ishlangan, madaniyat, sanʼat va turizm sohalaridagi zamonaviy yutuqlar aks etgan milliy pavilyonlar ochilgan. Shuningdek, milliy taomlar ko‘rgazmasi va pazandachilik bo‘yicha mahorat darslari tashkil etilgan.
Anʼanaviy o‘zbek hovlisi ko‘rinishida qurilgan O‘zbekiston pavilyoni tashrif buyuruvchilarda yorqin taassurot qoldirdi.
Tadbir mintaqaviy o‘ziga xoslik va madaniy rang-baranglikning navbatdagi namunasi sifatida o‘zaro anglashuvni mustahkamlashga hamda Markaziy Osiyoni tinchlik, barqarorlik va farovonlik makoni sifatida namoyon etishga xizmat qildi.
“O‘zbekiston Milliy pavilyoni”ning dizayni an’anaviy o‘zbek mahallasi asosida qurilgan bo‘lib, u daraxtlar bilan o‘ralgan va mamlakatning tarixiy binolarini aks etgan dekorativ arxitektura.
Funktsional zonalarga bo‘linish mantiqiy navigatsiyani, tashrif buyuruvchilarni jalb qilishni va madaniy qadriyatlarni samarali namoyish qilishni ta’minlaydi.
Tashkil etilgan “O‘zbekiston Milliy kuni” tadbirida xalqaro konferensiyaning ishtirokchilari, xorijiy davlatlarning diplomatik vakolatxonalari, xalqaro va mahalliy OAV vakillari hamda mahalliy ishtirokchilar tashrif buyurishdi.
Tadbirda madaniyat va san’at vakillari tomonidan milliy kuy-qo‘shiqlari va raqslari bilan badiiy chiqishlar namoyish etildi.
Shuningdek, mamlakatimiz gastronomik turizm salohiyatini keng targ‘ib etish maqsadida taniqli o‘zbek oshpazi boshchiligidagi oshpazlar jamoasidan o‘zbek milliy taomlari (4 xil osh va somsa, manti, kabob, Zomin tandir go‘shti) mehmonlarga tortiq etildi.
Bundan tashqari pavilyon ichida mashhur o‘zbek hunarmandlari tomonidan milliy hunarmandchilik mahsulotlari ko‘rgazmasi hamda mahorat darslari ham tashkil etildi.