Malayziya aviakompaniyasi O‘zbekistonning turizm salohiyatini ASEAN mamlakatlarida targ‘ib qiladi
2025-08-01 15:20:00 / Yangiliklar
Turizm qo‘mitasi raisi Umid Shadiyev Malayziyaning “AirAsia X” aviakompaniyasi bosh direktori Benyamin Ismail bilan uchrashdi.
Uchrashuvda Kuala-Lumpur va Toshkent o‘rtasida to‘g‘ridan-to‘g‘ri aviaqatnovning ochilishi arafasida qo‘shma marketing kampaniyasini yo‘lga qo‘yish masalalari muhokama qilindi. Ilk parvoz 2025-yil 14-noyabrga rejalashtirilgan. Kampaniya doirasida O‘zbekistonning sayyohlik salohiyatini targ‘ib qilish maqsadida ASEAN mamlakatlarining asosiy bozorlarida bir qator targ‘ibot tadbirlari o‘tkazish ko‘zda tutilgan.
Tomonlar "AirAsia X" bilan hamkorlik turizm sohasini rivojlantirish uchun yangi imkoniyatlar yaratishi, mamlakatlar o‘rtasidagi sayyohlik almashinuvini kuchaytirishi va o‘zaro iqtisodiy o‘sishga hissa qo‘shishiga ishonch bildirdilar.