Janubiy Koreyaning “MOVE” jurnali ijodiy guruhi Toshkent viloyati turizm salohiyati bilan tanishdi
2025-07-21 16:15:00 / Yangiliklar
Tashrif Turizm qo‘mitasi hamda Tashqi ishlar vazirligi hamkorligida tashkil etilgan bo‘lib, uning asosiy maqsadi — mamlakatimizning sayyohlik salohiyati, boy madaniy merosi va zamonaviy infratuzilmasini koreyalik auditoriyaga yetkazishdan iborat.
Ijodiy guruh avvalo Parkent tumaniga yo‘l oldi. Mehmonlarga tumandagi “Family Resort” oilaviy mehmon uyi, shuningdek, “Kumushkon” mahallasida joylashgan “Oltin bel” tepaligida rejalashtirilgan yangi turistik loyihalar — yengil turdagi mehmonxonalar, kurort zonalari va boshqa infratuzilma obyektlari taqdim etildi.
Shuningdek, guruh a’zolari shu kuni tantanali ravishda ochilgan “Chashma” etno-turizm qishlog‘i marosimida ham ishtirok etdilar. Mehmonlar milliy urf-odatlar, xalq ijodi, mahalliy mahsulotlar va o‘ziga xos turizm takliflari bilan tanishib, yurtimiz mehmondo‘stligidan chuqur taassurot oldilar.
Tashrif doirasida ijodiy guruh Bo‘stonliq tumaniga ham yo‘l olib, Amirsoy tog‘-chang‘i kurortida bo‘ldi. U yerda toza tabiat qo‘ynidagi dam olish maskanlari hamda sayyohlar uchun yaratilgan sharoitlar bilan yaqindan tanishdilar.
Mazkur tashrif natijasida tayyorlanadigan 150 betlik nashr Janubiy Koreyada keng auditoriyaga tarqatilishi, xususan, “Kyobo Book” kitob do‘koni, onlayn savdo platformalari, mehmonxonalar va aviakompaniyalarda taqdim etilishi rejalashtirilgan.
Toshkent viloyatida o‘tkazilgan ushbu tashrif viloyatning turizm salohiyatini xalqaro miqyosda targ‘ib qilishga xizmat qiladi.